İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 681 Hüküm no: 809 Orijinal metin no: [102b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdullah’ın Ariton v. Kirkor’a yaptırdığı evinin yıkılması üzerine çıkan anlaşmazlıkta sulh olduğu İbrâ. Mahmiye-i İstanbul’da Sofular mahallesinde sâkine Fâtıma bt. Abdullah nâm hatun meclis-i şer‘de işbu hâmilü’s-sifr Ariton v. Kirkor nâm tüccâr mahzarında ikrâr ve takrîr-i kelâm edip târih-i kitâbdan dört sene mukaddem mahalle-i mezbûrede vâki‘ ma‘lûmü’l-hudûd menzilimi kendi kerestem ile müceddeden binâ etmek için mezbûr Ariton’u on kıt‘a riyâlî guruşa istîcâr ol dahi ba‘de’l-kabûl menzil-i mezbûru binâ edip tamam oldukdan sonra mârrü’z-zikr binâ bi’l-külliye münhedim olmağla on iki bin akçe sarfımız telef olmağın merkūm Ariton’dan meblağ-ı mezbûru da‘vâ eylediğimde beynimizde münâza‘ât-ı kesîre vâkı‘a olmuş idi el-hâletü hâzihî beynimize muslihûn ve Müslimûn tavassut edip da‘vâ-yı mezkûreden beni dört bin akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûrun bin beş yüz akçesini mezbûr Ariton’un yedinden alıp kabz edip ba‘de’l-yevm husûs-ı mezbûra müte‘allika da‘vâdan mesfûr Ariton’un zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Sâbıkūn.