İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 681 Hüküm no: 810 Orijinal metin no: [102b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Mehmed’in Keçeci Pîrî mahallesindeki mülk menzilini Abdülbaki Beşe b. Mehmed’e sattığı Mülknâme. Mahmiye-i İstanbul’da Keçeci Pîrî mahallesi sâkinlerinden Ali Beşe b. Mehmed nâm kimesne meclis-i şer‘-i şerîf-i lâzımü’t-teşrîfde işbu bâ‘isü’r-rakīm Abdülbaki Beşe b. Mehmed mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı Ahmed Bey mülküne ve bir tarafı Nurullah Efendi mülküne ve bir tarafı Andriya nâm zimmî tasarrufunda olan arsa-i hâliyeye ve bir tarafı tarîk-i âmma müntehî iki bâb fevkānî oda ve bir sofa ve bir bi’r-i mâ ve cüneyneyi müştemil mülk menzilimi bi-cümleti’t-tevâbi‘ ve’l-levâhık mezbûr Abdülbaki Beşe’ye yirmi iki bin beş yüz fıddî râyic fi’l-vakt akçeye bey‘-ı bâtt-ı sahîh-i şer‘î ile bey‘ ve teslîm ol dahi ber-vech-i muharrer iştirâ ve kabûl ve kabz ve tesellüm eyledikden sonra meblağ-ı mezbûr yirmi iki bin beş yüz akçeyi mezbûr Abdülkadir yedinden bi’t-tamam ahz u kabz eyledim dedikde ba‘de’l-yevm menzil-i mahdûd-ı mezbûr merkūm Abdülbaki Beşe’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-hâmis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Efendi el-imâm, Mehmed Çelebi el-müezzin, Osman Çelebi b. İbrahim, Mehmed Çelebi b. Ali er-râcil, Ali Bey b. Ömer bevvâb-ı sultanî, Hüseyin Beşe b. Abdullah er-râcil, Mustafa b. Mehmed, Ali b. Hüseyin, Şükrullah b. Mustafa, Veli b. Mahmud, Mehmed b. Halil.