İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 682 Hüküm no: 811 Orijinal metin no: [102b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Ahmed Paşa’nın Cebecibaşı Ali Ağa’ya 1.140 riyâlî guruş borcu olduğunu ikrar ettiği İkrâr-ı deyn. Guruş: 1100 aded. Mahmiye-i İstanbul’da Ayasofya-i kebîr mahallesinde sâkin Mehmed Bey b. el-merhûm Ahmed Paşa meclis-i şer‘de mahmiye-i mezbûrede Süleymâniye mahallesinde sâkin işbu râfi‘u’l-kitâb fahrü’l-emâcid ve’l-ekârim câmi‘ü’l-mehâmid ve’l-mekârim Cebecibaşı Ali Ağa tarafından ikrâr-ı âti’z-zikri tasdîka vekîl olup nehc-i şer‘î ve vech-i mer‘î üzere vekâleti sâbite olan el-Hâc Mustafa b. İbrahim mahzarında ikrâr ve takrîr-i kelâm edip Bâbüssa‘âde ağası ammim İsmail Ağa merhûmun evkāfından medîne-i Malatya’da vâki‘ ihtisâb ve Zorvat [Zorvari] mezrâ‘asının kurâ ve tevâbi‘ât ve boyahânesiyle mezbûr Ali Ağa’ya bin yetmiş bir Muharremi’l-harâm’ının gurresinde sene-i mezbûre gāyetine dek bin dokuz yüz kırk riyâlî guruşu tevliyetim hasebiyle verip ol dahi der-uhde ve iltizâm eyledikden sonra sekiz yüz riyâlî guruşun ber-vech-i peşîn mezbûr Ali Ağa yedinden ahz eylediğimden sonra kable’z-zabt tevliyet-i mezbûreden ben ma‘zûl olup yerime âhar kimesne mütevellî olmağla meblağ-ı mezbûr zimmetimde mezbûr Ali Ağa’ya lâzımü’l-edâ ve vâcibü’l-kazâ deynimdir dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Muslı Ağa b. İbrahim, Ali Bey b. Abdullah, Hacı Hüseyin, Hacı İbrahim, Hacı Hasan, Hacı Ahmed.