İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 683 Hüküm no: 813 Orijinal metin no: [103a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Mehmed’in Maruloğlu mahallesindeki menzilini İsmail Ağa b. Mustafa ve kardeşi Hacı İshak Ağa’ya sattığı Mübâya‘a ale’l-iştirâk. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Tarakcılar içinde Dâye Hatun mahallesinde fahrü’l-akrân Mehmed Ağa b. Ali’nin menziline varıp zeyl-i rakīmde esâmîleri mastûr Müslimîn huzûrunda akd-i meclis-i şer‘ eyledikde sâbıkā mahmiye-i mezbûrede gümrük emîni olan fahrü’l-emâsil ve’l-a‘yân Ahmed Ağa b. Mehmed meclis-i mezbûrda işbu kitâbın sahibi mukaddemâ rikâb-ı hümâyûnda haseki olmağla şeref-yâb olan mefharu’l-mefâhir ve’l-meâli İsmail Ağa b. Mustafa tarafından husûs-ı âti’z-zikre vekîl olup fahrü’l-emâsil Mustafa Bey b. Mehmed ve el-Hâc İbrahim b. Hüseyin şehâdetleri ile hasm-ı câhid mahzarında vekâleti şer‘an sâbite olan el-Hâc Ali Çelebi b. Ahmed ile mûmâ-ileyh İsmail Ağa’nın li-ebeveyn karındaşı kıdvetü ashâbü eşrefü’l-meşâyih el-Hâc İshak Ağa mahzarında ikrâr ve takrîr-i kelâm edip mahmiye-i mezbûrede Bağçekapısı dâhilinde Maruloğlu mahallesinde vâki‘ bir tarafdan İmad Ağa mülküne ve bir tarafdan Kılıç Ali Paşa Vakfı’na ve iki tarafdan tarîk-i âmma müntehî ve mahdûd olup dâhiliyesi üç bâb fevkānî nâ-tamam oda ve bir sofa ve dehliz ve fevkānî mâbeyn odası ve ona muttasıl iki bölme nâ-tamam oda ve bir kenîf ve bir harâbe hamam ve câmekân ve iki mahzen ve bir su kuyusunu hâvî ve hâriciyesi tabaka-i ulyâda iki bâb nâ-tamam oda ve birbirine muttasıl dört bâb nâ-tamam oda ve iki şehnişînli bir oda ve üç sofa ve iki dehliz ve tabaka-i vüstâda yedi bâb nâ-tamam odayı ve bir mahzen ve bir ahır ve iki su kuyusu ve arsa-i hâliye ve havlu ve kenîfi müştemil olup arsasının sekiz yüz altmış dört zirâ‘ı İsterongele nâm Yahûdiye vakfından icâre-i mu‘accele ve senede bin beş yüz akçe ücret-i mü’eccele ve yirmidört zirâ‘ arsasının Ayasofya-i kebîr Vakfı’na senede onar iki akçe mukāta‘ası olup binâsı mülküm olan menzilimin ebniyesini bi-cümleti’t-tevâbi‘ ve’l-levâhık on üç yük akçeye müşârün-ileyhimâ İsmail Ağa ve İshak Ağa’ya bâtten bey‘ ve teslîm onlar dahi iştirâk-i seviy vechi üzere iştirâ ve tesellüm ve kabûl ve zikrolunan İsterongele Vakfı’ndan olan arsanın hakk-ı tasarrufunu meşrûtiyyet üzere mütevellîleri olan İbrahim b. Abdullah ve Ali b. Abdullah nâm mühtediler izinleri ile bir yük akçeye müşârün-ileyhimâ İsmail ve İshak Ağa’ya ferâğ ve tefvîz onlar dahi ber-minvâl-i muharrer tefevvüz ve kabûl eylediklerinden sonra semen-i mezkûr on üç yük akçe ile bedel-i mezbûr bir yük akçeyi bi’t-tamam ve’l-kemâl mezbûrân İsmail Ağa ve İshak Ağa yedlerinden alıp kabz eyledim ba‘de’l-yevm menzil-i mezbûrun ebniye-i merkūmesi mülk-i müşterâları ve arsa-i mezkûresi dahi hakk-ı müfevvazlarıdır keyfe mâ yeşâ’ ve yahtâr mutasarrıf olsunlar dedikde mukırr-ı mezbûr Ahmed Ağa kelimât-ı muharreresinde vekîl-i mezbûr el-Hâc Ali Çelebi ile mûmâ-ileyh İshak Ağa bi’l-muvâcehe tasdîk ve bi’l-müşâfehe tahkīk eylediklerini mevlânâ-yı mezbûr mahâllinde tahrîr ba‘dehû ma‘an irsâl olunan Şaban Beşe b. Ahmed ve Abdülkerim b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-akrân Şahbaz Ağa b. ( ), Fahrü’l-a‘yân el-Hâc Receb Ağa b. Halil, Zahru’l-emâsil Mehmed Ağa b. Ali, Umdetü’l-a‘yân el-Hâc Osman b. İsa, Zübdetü’l-emsâl Mustafa Ağa b. Mehmed, el-Hâc İbrahim Ağa b. Hüseyin.