İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 685 Hüküm no: 815 Orijinal metin no: [103a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed Efendi’nin vakıf arsa üzerine yaptığı binalarının çocuklarına intikal ettiği Hüccet-i menzil, ırsen babasından oğullarına intikāl. Mahmiye-i İstanbul’da Dizdâriye mahallesinde vâki‘ merhûm Kamer Hatun bt. İskender nâm sahibetü’l-hayr vakıf ve süknâsını ulemâdan bir recül-i sâlihe şart ve ta‘yîn eylediği bir tarafdan Medîne-i Münevvere Vakfı’ndan olup Ahmed Ağa tasarrufunda olan menzile ve bir tarafdan ba‘zan Mustafa Ağa veresesi mülklerine ve ba‘zan Ali Çavuş mülküne ve iki tarafdan tarîk-i âm ile mahdûd menzile şart-ı vâkıfe üzere tevcîh-i hâkimü’ş-şer‘le mutasarrıf olan Abdülkerim Efendi b. Mehmed Efendi menzil-i mezbûrda kendi mâlıyla mülkü olmak üzere izn-i mütevellî ve hâkimü’ş-şer‘ ma‘rifeti ile ebniye ihdâs edip ba‘dehû mezbûr Abdülkerim Efendi ebniye-i memlûkesini ulemâdan Mehmed Efendi b. Mehmed’e üç yüz riyâlî guruşa bey‘ ve kabz-ı semen edip ve arsası dahi tevcîh-i hâkimü’ş-şer‘le mezbûr Mehmed Efendi’ye tevcîh olunup tasarrufunda iken bin yetmiş senesi Zilka‘desi’nin on altıncı gününde vâki‘ harîk-i ekberde bi’l-külliye muhterik oldukda mezbûr Mehmed Efendi b. ( ) [izn-i] mütevellî ile hâkimü’ş-şer‘ ma‘rifetleri ile kendi mâlıyla mülkü olmak üzere müceddeden etrâf-ı erba‘asını taş duvar binâ edip mezbûr Mehmed Efendi hâlâ fevt olmağla ebniye-i mesfûre sulbî oğulları Mehmed ve Mustafa’ya ve sulbiye kızı Hadice’ye ırsen intikāl edip arsası mahlûle olmağla arsa-i mezbûre de kıbel-i şer‘den mezbûrân Mustafa ve Mehmed’e tevcîh olunup tasarrufları için bu vesîka ketb ve yedlerine def‘ olundu. Fi’l-yevmi’s-sâbi‘ işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Keşfî Mustafa Efendi el-kâtib, Mehmed Efendi el-kâtib, Ahmed Efendi el-kâtib, Ahmed Efendi b. Mehmed el-kâtib.