İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 685 Hüküm no: 816 Orijinal metin no: [103b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey b. İbrahim’in Mustafa Bey b. Hasan ile aralarındaki alacak davasında sulh oldukları Sulh, ibrâ. Mahmiye-i İstanbul hısnı ebvâbından Bağçekapısı dâhilinde sâkin Mustafa Bey b. İbrahim meclis-i şer‘de işbu bâ‘isü’l-kitâb diğer Mustafa Bey b. Hasan mahzarında ikrâr ve takrîr-i kelâm edip bundan akdem mezbûr Mustafa Bey b. Hasan’ın kendi birâderi gāib ani’l-meclis Ömer Bey nâm kimesneye “cihet-i karz-ı şer‘îden olan yedi bin beş yüz akçe deynimi birâderim mezbûr Ömer Bey’e edâ eyle, ben sana edâ edeyim” deyü bana emredip ben dahi mezbûr Mustafa Bey’in emrine binâen karındaşı mezbûr Ömer Bey’e meblağ-ı mezkûru tamamen edâ ve teslîm eylediğimden sonra meblağ-ı mezkûr mezbûr [Mustafa] Bey’in emrine binâen lâzımü’l-edâ ve vâcibü’l-kazâ deyni olmağla bundan akdem meblağ-ı mezkûr mezbûr Mustafa Bey’den da‘vâ ve taleb eylediğimde ol dahi bana emrini inkâr etmeğin beynimizde münâza‘ât-ı kesîre vâkı‘a olmuş idi el-hâletü hâzihî vesâtet-i muslihîn ile meblağ-ı mezkûr yedi bin beş yüz -7.500- akçeden mezbûr Mustafa Bey benimle üç bin yedi yüz akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı merkūmu bi’t-tamam ahz u kabz edip mâ‘adâsı da‘vâsından mezbûrun zimmetini ibrâ ve israt eyledikden sonra târih-i vesîkaya gelince beynimizde vâki‘ ahz u i‘tâ ve mu‘âmelât-ı şettâya müte‘allika de‘âvî ve mütâlebâtdan birbirimizin zimmetini ibrâ-i âm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis a‘şâr min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Süleyman Beşe b. Mehmed el-mübâşir, Cafer Çavuş b. Kanca Murad Bey, Şükrullah b. Mustafa, Gazanfer b. Tevekkül, Abdi Çelebi b. Hüseyin.