İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 686 Hüküm no: 817 Orijinal metin no: [103b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey b. Hasan’ın Mustafa Bey b. İbrahim ile aralarındaki alacak davasında sulh olduğu Sulh, ibrâ-i tarafeyn. Medîne-i Üsküdar’da Ayazma Bağçesi kurbünde sâkin Mustafa Bey b. Hasan meclis-i şer‘de işbu bâ‘isü’l-vesîka diğer Mustafa Bey b. İbrahim mahzarında ikrâr ve takrîr-i kelâm edip mezbûr Mustafa Bey b. İbrahim’in kasaba-i Ankara a‘yânından gāib ani’l-meclis Mehmed Efendi nâm kādı zimmetinde cihet-i karz-ı şer‘îden olan on iki bin beş yüz akçe hakkını ahz u kabza ve kendiye îsâle beni vekîl ve hizmetim mukābelesinde bana iki bin beş yüz akçe ücret vermek üzere mezbûr ile kavl ve kabûl eylediğimden sonra kasaba-i mezbûreye varıp meblağ-ı mezkûr on iki bin beş yüz akçenin mezbûr Mehmed Efendi’den ancak dört bin beş yüz akçesini kabz ve mezbûr Mustafa Bey’e teslîm edip ücret-i mezbûreyi mezbûrdan taleb eylediğimde tamam vermede ta‘allül ve imtinâ‘ edecek beynimizde münâza‘ât-ı kesîre vukū‘undan sonra vesâtet-i muslihîn ile ücret-i mezbûreden merkūm Mustafa Bey benimle bin beş yüz akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh-ı mezkûru yedinden tamamen kabz ve mâ‘adâsından zimmetini ibrâ ve ıskāt edip min-ba‘d târih-i kitâba gelince beynimizde vâki‘ ahz u i‘tâ ve mu‘âmelât-ı şettâya müte‘allika âmme-i de‘âvî ve mütâlebât ve eymân ve muhâsamâtdan biri birimizin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâdis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Sâbıkūn.