İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 687 Hüküm no: 818 Orijinal metin no: [103b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ahmed’in, ölen kocası Halil Beşe’nin Mehmed Beşe b. Murad’da olan alacağındaki payının kendisine ödenmesi Vilâyet-i Anadolu’da Mudurnu kazâsına tâbi‘ Papas nâm karyeden Fâtıma bt. Ahmed nâm hatun tarafından husûs-ı âti’z-zikre vekâlet iddi‘â eden Ramazan Beşe b. Bâyezid meclis-i şer‘de mahmiye-i İstanbul’da Dergâh-ı âlî yeniçerilerine mahsûs yetmiş sekizinci cemâ‘atinden Mehmed Beşe b. Murad mahzarında üzerine bi’l-vekâle da‘vâ ve takrîr-i kelâm edip müvekkilem mezbûrenin zevci olup Belgrad kasabasında sâkin iken bundan akdem bilâ-veled vefât eden Halil Beşe’nin mezbûr Mehmed Beşe zimmetinde karzdan beş yüz akçe hakkı olup meblağ-ı mezbûrun rub‘u olan yüz yirmi beş akçeyi müvekkilem mezbûre kabza beni vekîl etmekle ben dahi vekâlet-i mezbûreyi kabûl etmiş idim hâlâ meblağ-ı mezbûru taleb ederin suâl olunsun dedikde gıbbe’s-suâl mezbûr Mehmed Beşe cevâbında merkūm Halil Beşe’nin cihet-i mezbûreden zimmetimde beş yüz akçesi vardır lâkin mezbûr Halil Beşe’nin vefât etdiği merkūm Ramazan Beşe’nin vekâleti ma‘lûmum değildir deyü inkâr edicek evvelâ mezbûr Ramazan Beşe’den vekâletine beyyine taleb olundukda karye-i mezbûre sükkânından Hüseyin b. Ahmed ve Ali b. Hasan nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûre Fâtıma Hatun’a merkūm Mehmed Beşe zimmetinde olan meblağ-ı mezbûrdan hisse-i şer‘iyesini kabza bizim huzûrumuzda mezbûr Ramazan Beşe’yi vekîl nasb ve ta‘yîn eyledikde ol dahi vekâlet-i mezbûreyi kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ve ba‘de’t-ta‘dîl ve’t-tezkiye şehâdetleri makbûle oldukdan sonra sâniyen mezbûr Halil Beşe’nin vefâtına beyyine taleb olundukda zikrolunan oda ahâlîsinden Hüseyin Beşe b. Ali ve Mehmed Beşe b. İbrahim nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûr Halil Beşe zikrolunan Belgrad kasabasında bi-emrillâhi te‘âlâ vefât edip cenazesine biz hazır olduk meblağ-ı mezbûr zevce-i menkûhası merkūme Fâtıma ile li-ebeveyn karındaşları Osman’a ve Hüseyin’e isâbet ve intikāl edip gayrı vârisi olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-tasdîkı’ş-şer‘î şehâdetleri makbûle olmağın mûcebince ba‘de’l-hükm meblağ-ı mezbûr beş yüz akçeden yüz yirmi beş akçeyi vekîl-i mezbûra teslîme mezbûr Mehmed Beşe’ye tenbîh olunup mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Efendi b. Pîrî, Mahmud b. Mustafa, Kaya b. Mahmud, Sefer Beşe b. ( ), Rasûl b. Rıdvan ve gayruhum.