İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 688 Hüküm no: 819 Orijinal metin no: [104a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Ali mahallesinde ismi bilinmeyen deli bir kadının kendisini asarak intihar ettiği Mahmiye-i İstanbul’da hâlâ subaşı olan fahrü’l-akrân Mehmed Ağa b. Ahmed Efendi tarafından husûs-ı âti’l-beyâna sâbitü’l-vekâle vekîli olan Eyüb Beşe b. Musa nâm râcil mahfil-i kazâda takrîr-i kelâm edip mahmiye-i mezbûrede Derviş Ali mahallesinde ismi ma‘lûmum değil bir hatun Gendümî Ahmed Efendi nâm kimesnenin menzilinin tarîk-i âm tarafında vâki‘ tahtânî penceresinin demirine çuka kenarı ile asıp fevt olduğu mesmû‘umuz olmağın hâlâ cânib-i şer‘den üzerine varılıp ba‘de’l-keşf husûs-ı mezbûr ahâlî-i mahalle-i mezbûreden teftîş ve tefahhus olunmak matlûbumdur dedikde savb-ı şer‘den Mevlânâ Keşfî Mustafa Efendi irsâl olunup ol dahi zeyl-i vesîkada muharrerü’l-esâmî olan Müslimîn ile merkūm Ahmed Efendi’nin sâkin olduğu menzili üzerine varıp nazar etdikde fi’l-vâki‘ tarîk-i âm tarafında vâki‘ tahtânî penceresinin demirinde çuka kenarı ile asıp fevt olduğu müşâhede eyledikden sonra zeyl-i hüccetde esâmîleri mastûr olan mahalle-i mezbûre ahâlîsinden suâl olundukda onlar dahi bu maslûbe hatun mecnûne olup mukaddemâ mahallemiz kurbünde Kethudâ Hatun Câmi‘-i Şerîfi hareminde sâkine olup firâr eyledi birkaç zamandır ki merkūm Ahmed Efendi’nin sâkin olduğu menzilinin saçağı altında tarîk-i âm üzerinde oturup âyende vü revendeden sadaka taleb ederdi târih-i kitâb günü menzillerimizden çıkıp mecnûne-i mezbûreyi bu minval üzere maslûbe gördük deyü her biri alâ-tarîkı’ş-şehâde haber verdiklerini mevlânâ-yı mezbûr mahâllinde tahrîr ba‘dehû ma‘an irsâl olunan Mustafa b. İsa ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Çorbacı Mehmed Ağa b. Mustafa, İsmail Ağa b. Abdullah, Ali Çelebi b. Abdullah, Ahmed Efendi b. Zeynelabidin, Receb Efendi b. Hasan, Salih Efendi b. ( ) el-imâm.