İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 688 Hüküm no: 820 Orijinal metin no: [104a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Musa’nın Hızır Bey mahallesindeki arsasını Hacı Ahmed Beşe b. Müstecab’a sattığı Mübâya‘a. Kasaba-i Kasım Paşa’da Câmi‘-i kebîr mahallesinde sâkin olup sinn ü cüssesinin bulûğa tahammülü ve bulûğuna mu‘terif olan Mustafa Çelebi b. Musa meclis-i şer‘de işbu bâ‘isü’l-kitâb el-Hâc Ahmed Beşe b. Müstecâb mahzarında bi-tav‘ihiikrâr ve takrîr-i kelâm edip silk-i mülk-i sahîhimde münselik olup mahmiye-i İstanbul’da Hızır Bey mahallesinde vâki‘ bir tarafı müşteri-i mezbûr el-Hâc Ahmed Beşe mülküne ve bir tarafı Çıkrıkcı Hasan Beşe mülküne ve bir tarafı Mehmed Efendi mülküne ve bir tarafı tarîk-i hâssa müntehî muhterik menzil arsasını bi-cümleti’t-tevâbi‘ ve’l-levâhık ve kâffetü’l-hukūk ve’l-merâfik on sekiz bin beş yüz nakd-i râyic fi’l-vakt akçeye mezbûr el-Hâc Ahmed Beşe’ye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm ol dahi ber-vech-i muharrer iştirâ ve kabûl ve kabz ve tesellüm eyledikden sonra ba‘de’l-yevm zikri mürûr eden muhterik menzil arsası müşteri-i mezbûr el-Hâc Ahmed Beşe’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin a‘şâr min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Hüseyin Efendi b. Abdülvehhab el-imâm, Mehmed Ağa b. Pervâne el-cündî, Pîrî Çelebi b. Veli bevvâb-ı sultanî, el-Hâc Yahya b. Abdurrahim, Mehmed Çelebi b. Ali, Hammâmcı Hüseyin Ağa b. Hasan el-müezzin, Küçük Mehmed Çelebi, Murtaza Çelebi el-kayyum, Emrullah Çelebi b. Cafer, el-Hâc Mehmed el-bevvâb-i sultanî, Keşfî Mustafa Efendi.