İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 690 Hüküm no: 823 Orijinal metin no: [104a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Hacı Muharrem’in Firuzağa mahallesindeki arsasını Hacı Yusuf Çelebi b. Abdullah’a sattığı Mülknâme. Mahmiye-i İstanbul’da Firuzağa mahallesinde sâkin Ahmed b. el-Hâc Muharrem meclis-i şer‘de bâ‘isü’r-rakīm el-Hâc Yusuf Çelebi b. Abdullah mahzarında ikrâr ve i‘tirâf edip mahalle-i mezbûrede vâki‘ bir tarafı benim mülküme ve bir tarafı Fâtıma Hatun menziline ve bir tarafı Halil Çavuş menziline ve bir tarafı Şeref Hatun Vakfı’na müntehî tûlen on iki ve arzan dört buçuk zirâ‘ mülk arsa-i hâliyemi mezbûr el-Hâc Yusuf Çelebi’ye bâtten bey‘ ve teslîm ol dahi vech-i muharrer üzere iştirâ ve tesellüm ve kabûl ve kabz etdikden sonra semeni olan meblağ-ı mezbûru yedinden ahz u kabz edip arsa-i mezbûre merkūmun mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâbi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Şükrullah b. Mustafa, Rasûl b. Rıdvan, Abdi b. Hüseyin, Mehmed b. Ramazan.