İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 694 Hüküm no: 830 Orijinal metin no: [105a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pano v. İstadi’nin, Bağdasar v. Serkiz’e vakıf dükkândaki tasarruf hakkını şartlı devir işlemi geçersiz olduğundan aldığı parayı iade etmesi gerektiği Mahmiye-i İstanbul’da Hâcce Hatun mahallesinde sâkin Bağdasar v. Serkiz nâm Ermeni meclis-i şer‘-i hatîrde Pano v. İstadi nâm zimmî muvâcehesinde üzerine da‘vâ ve takrîr-i kelâm edip merhûm Pîrî Paşa Vakfı’ndan olup mahmiye-i mezbûrede Uzunçarşı sûkunda vâki‘ bir tarafdan Kâtib Ahmed Efendi dükkânı ve bir tarafdan Papanioğlu dükkânı ve iki tarafdan tarîk-i âmma müntehî icâreteyn-i ma‘lûmeteyn ile mezbûr Pano’nun tasarrufunda olan altı mahzen bir kepenk dükkânını târih-i kitâbdan bir sene mukaddem vakf-ı mezbûr mütevellîsi ma‘rifetiyle otuz bin akçe bedel-i medfû‘ mukābelesinde bana ferâğ ve tefvîz ben dahi tefevvüz ve kabûl eylemişdim hâlâ mezbûr Pano tasarrufuma mâni‘ olur suâl olunup kasr-ı yedine tenbîh olunmak matlubumdur dedikde gıbbe’s-suâl mezbûr Pano cevâbında kazıyye tafsîli mürûr eden vech üzere olduğunu ikrâr lâkin zikrolunan mahzen ve dükkân ancak mezbûr Bağdasar’a beher yevm beşer akçe ücret verip helâkime değin içinden beni çıkarmamak şartıyla bedel-i medfû‘-ı mezkûra ferâğ etmiş idim lâkin şartıyla tefvîz fâsid olup ferâğ mu‘teber olmamağla ferâğ-ı mezkûru fesh murâdımdır deyü def‘le mukābele edecek akībe’l-istintâk ve’l-inkâr mezbûr Pano’dan şart-ı mezkûra beyyine taleb olundukda udûl-i Müslimînden el-Hâc Osman b. Pervâne el-müezzin ve takyeci tâifesinden Şimo v. Miho ve Todori v. Duka ve Dimitri v. Ayo nâm zimmîler meclis-i şer‘a hâzırûn olup istişhâd olunduklarında fi’l-vâki‘ mezbûr Pano zikrolunan dükkân ve mahzeni bir sene mukaddem huzûrumuz[da] şart-ı mezkûr ile bedel-i medfû‘-ı mezkûr otuz bin akçe mukābelesinde mezbûr Bağdasar’a ferâğ ve tefvîz eylemişdir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın bedel-i medfû‘-ı mezkûr otuz bin akçeyi mezbûr Bağdasar’a redd ü teslîme mezbûr Pano’ya ba‘de’t-tenbîh mezbûr Bağdasar’a mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Hüseyin b. Ebûbekir, Mustafa b. İsa. Şükrullah b. Mustafa, Abdi Çelebi b. Hüseyin, el-Hâc Ahmed b. Mahmud kethudâ-yı muhzırân, Çukadâr Hasan Beşe er-râcil.