İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 695 Hüküm no: 831 Orijinal metin no: [105a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Rıdvan b. Mehmed’in Mustafa Paşa mahallesindeki menzilini Kadı Sefer Efendi b. Bali’ye sattığı İkrâr-ı semen-i bâkī. Kuzât-ı Rûmiyyeden işbu râfi‘u’l-kitâb Sefer Efendi b. Bali meclis-i şer‘de el-Hâc Rıdvan b. Mehmed mahzarında üzerine da‘vâ edip târih-i kitâbdan bir gün mukaddem mezbûr el-Hâc Rıdvan mahmiye-i İstanbul’da Mustafa Paşa mahallesinde vâki‘ bir tarafdan Mustafa Çelebi mülküne ve bir tarafdan Halil Beşe mülküne ve iki tarafdan tarîk-i âmma müntehî ve mahdûd dâhiliyesi tabaka-i ulyâda iki bâb fevkānî oda ve iki sofa ve vüstâda iki bâb odayı ve altlarında iki bâb oda ve matbah ve kenîfi ve bahçeyi hâvî ve hâriciyesi iki bâb fevkānî odayı müştemil olan mülk menzilini yüz doksan bin akçeye tarafımızdan şirâya vekîlim olan el-Hâc Murad b. Osman’a bâtten bey‘ ol dahi minvâl-i muharrer üzere menzil-i mezbûru benim için iştirâ edip semeninden kırk bir altını vekîlim mezbûra teslîm ol dahi yedinden kabz ve tesellüm eylemişken hâlâ semen-i mezbûrdan bâkī kalan meblağı alıp menzili bana [teslîm] eyle dediğimde imtinâ‘ eder suâl olunup mebî‘-i mezbûru bana teslîm etdirip ve semen-i bâkīyi yedinden teslîme mezbûr el-Hâc Rıdvan’a tenbîh olunmak murâdımdır dedikde gıbbe’s-suâl mezbûr el-Hâc Rıdvan cevâbında kazıyye bâlâda tafsîli mürûr olduğu üzere bey‘-ı mezbûrun vukū‘unu bi-tav‘ihiikrâr etmeğin alâ-mûceb-i ikrârihî semen-i bâkīyi kabz edip menzil-i mezbûru teslîme mezbûr el-Hâc Rıdvan’a tenbîh birle mâ-vaka‘a bi’t-taleb ketb olundu. Fi’l-yevmi’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Şaban Çelebi b. Mustafa, Mustafa Efendi b. Mahmud Efendi, İbrahim Çelebi b. Mehmed, Mehmed b. Muharrem, Hüseyin b. Ali, el-Hâc Mehmed b. Ahmed, Mustafa b. Osman, Salih Çelebi b. Şaban.