İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 701 Hüküm no: 838 Orijinal metin no: [106b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi b. Seyyid Mehmed’in Atik Ali Paşa mahallesindeki menzilini Yunus Ağa b. Ahmed’e sattığı Mübâya‘a. 390 esedî guruş. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed irsâl olunup ol dahi mahmiye-i İstanbul’da Kirmasti mahallesinde Yunus Ağa b. Ahmed’in sâkin olduğu menziline varıp zeyl-i vesîkada isimleri mastûr Müslimîn huzûrunda akd-i meclis-i şer‘ etdikde mahmiye-i mezbûrede Ali Paşa-yı Atîk mahallesinden Seyyid Mustafa Efendi b. Seyyid Mehmed meclis-i ma‘kūd-ı mezbûrda bâ‘isü’r-rakīm merkūm Yunus Ağa muvâcehesinde ikrâr ve i‘tirâf edip silk-i mülkümde münselik Ali Paşa-yı Atîk mahallesinde vâki‘ bir tarafı Zahide Hatun mülküne ve bir tarafı Ali Paşa Câmi‘i bahçesine ve iki tarafı tarîk-i âmma müntehî menzilimi bi-tarîkı’l-istiğlâl mezbûr Yunus Ağa’ya üç yüz doksan esedî guruşa bey‘ ve teslîm ol dahi ber-vech-i muharrer iştirâ ve kabûl ve kabz ve tesellüm eyledikden sonra semeni olan meblağ-ı mezbûru mezkûr Yunus Ağa yedinden ahz u kabz edip menzil-i mezbûru ba‘de’t-tahliyeti’ş-şer‘iye ve’t-tekābuzi’l-mer‘î târih-i kitâbdan iki yüz gün tamamına değin altmış esedî guruşa merkūm Yunus Ağa’dan istîcâr ve kabûl edip ol dahi ber-vech-i muharrer îcâr ve teslîm eyledi dedikde gıbbe’t-tasdîk vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Seyyid Mehmed Mirza Çelebi b. Ali, İbrahim Çelebi b. Süleyman, İbrahim Çelebi b. Osman, Hüseyin Efendi el-imâm, Ömer Çelebi b. ( ), Mustafa b. Mehmed.