İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 702 Hüküm no: 839 Orijinal metin no: [106b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Yako’nun kiracısı olduğu vakıf şemhanenin günlük on akçe olan kira ücretinin altı akçeye indirildiği Hüccet-i tenzîl-i şem‘hâne. Hâlâ şeyhü’l-meşâyihi’l-İslâm müfti-i âmmeti’l-enâm mena‘allâhu’l-Müslimîn bi-vücûdi vücûdihî ilâ-sâ‘ati’l-kıyâm hazretleri nezâret-i aliyyelerinde olup mahmiye-i İstanbul’da Ayakapısı hâricinde vâki‘ merhûm ve mağfûrun-leh Ebussuûd Efendi Evkāfı’ndan bir tarafdan ( ) nâm kimesnenin selhhânesi arsasına ve iki tarafdan tarîk-i âmma ve bir tarafdan ( ) nâm zimmî mülküne müntehî fevkānî ve tahtânî bir bâb şem‘hânenin nısf-ı şâyi‘ hissesine icâre-i mu‘accele ve mukaddemâ yevmî on akçe ücret-i mü’eccele ile mutasarrıf olan işbu hâmilü’s-sifr Kostantin v. Yako nâm zimmî meclis-i şer‘de takrîr-i kelâm edip tasarrufumda mârrü’z-zikr nısf şem‘hânenin icâre-i mü’eccelesi olan yevmî on akçe ecr-i mislinden ziyâde olmağla hâlâ vakf-ı mezbûr mütevellîsi Mehmed Ağa dört akçesini tenzîl edip yevmî altı akçe ücret-i mü’eccele ile bana îcâr ve ben dahi istîcâr ve kabûl ve icâre-i mu‘accelesine mahsûb olmak üzere mütevellî-i mezbûr yedine vakıf için üç bin akçe verip ve cüz’î ve küllî imâret ve meremmeti dahi icâre-i mu‘acceleye mahsûb olmak üzere yedime müceddeden işbu temessük vermişdir nazar olunup mûcebince cânib-i şer‘den dahi hüccet tahrîr olunmak matlûbumdur deyü takrîr-i meşrûhunu nâtık mütevellî-i mezbûrun imzâ ve hâtemini hâvî temessük ibrâz etmeğin ba‘de’n-nazar savb-ı şer‘den istihkâmen işbu hurûf bi’t-taleb ketb olundu. Fi’l-yevmi’s-sâbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Efendi el-imâm, Muslı Çelebi el-müezzin, Hasan Çelebi el-kâtib, Muslı Çelebi el-câbî, Ömer b. Abdullah, Kadri Çelebi el-cündî, Mehmed b. Abdullah, Şükrullah b. Mustafa, Mustafa b. Mehmed, Mustafa b. İsa.