İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 702 Hüküm no: 840 Orijinal metin no: [106b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Angeli v. Yani’nin kiracısı olduğu vakıf şemhanenin kira ücretinin günlük on akçeden altı akçeye indirilmesi Hüccet-i tenzîl, eydan. Hâlâ şeyhülislâm [ve] müfti-i ammetü’l-enâm hazretlerinin nezâret-i aliyyelerinde olup mahmiye-i İstanbul’da Ayakapısı hâricinde merhûm Ebussuûd Efendi Evkāfı’ndan bir tarafdan ( ) nâm kimesnenin selhhânesi arsasına ve iki tarafdan tarîk-i âmma ve bir tarafdan ( ) nâm zimmî mülküne müntehî fevkānî ve tahtânî bir bâb şem‘hânenin nısf-ı şâyi‘ hissesine icâre-i mu‘accele ve mukaddemâ yevmî on akçe ücret-i mü’eccele ile mutasarrıf olan işbu hâmilü’s-sifr Angeli v. Yani nâm zimmî meclis-i şer‘-i hatîrde takrîr-i kelâm edip tasarrufumda olan mârrü’z-zikr nısf şem‘hânenin icâre-i mü’eccelesi olan yevmî on akçe ecr-i mislinden ziyâde olmağla hâlâ vakf-ı mezbûr mütevellîsi Mehmed Ağa dört akçesini tenzîl edip yevmî altı akçe ücret-i mü’eccele ile bana îcâr ve ben dahi istîcâr ve kabûl ve icâre-i mu‘accelesine mahsûb olmak üzere mütevellî-i mezbûr yedine vakıf için üç bin akçe verip ve cüz’î ve küllî imâret ve meremmeti dahi icâre-i mu‘acceleye mahsûb olmak üzere yedime işbu temessükü vermişdir nazar olunup mûcebince cânib-i şer‘den dahi hüccet tahrîr olunmak murâdımdır deyü takrîr-i meşrûhunu nâtık mütevellî-i mezbûrun imzâ ve hâtemini hâvî temessük ibrâz etmeğin ba‘de’n-nazar cânib-i şer‘den istihkâmen işbu hurûf ketb olundu. Fi’s-sâbi‘ aşer min-Zilka‘de li-sene isneteyn ve seb‘în ve elf. Şuhûdü’l-hâl: es-Sâbıkūn.