İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 704 Hüküm no: 843 Orijinal metin no: [107a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hızır Halife b. Mansur’un Neslişah Sultan’ın yaptırdığı camiye geçici olarak hatip tayin edildiği Nasb-ı kāimmakām-ı hitâbet. Mahmiye-i İstanbul’da vâki‘ merhûme ve mağfûrun-lehâ Neslişah Sultan binâ eylediği câmi‘-i şerîfin hâlâ hatîbi olan Mustafa Efendi b. Ali nâm kimesneye bi-emrillâhi te‘âlâ sevdâ marazı târî olup hizmet-i hitâbete iktidârı olmayıp işbu hazır bi’l-meclis Hızır Halîfe b. Mansur sâlih ve mütedeyyin ve şerâyit-i hidemât-ı hitâbeti râ‘î olduğunu câmi‘-i mezbûr cemâ‘atinden el-Hâc Mustafa b. Mehmed ve Mehmed Çelebi b. Ahmed el-yesârî ve Hüseyin Dede b. Musa ve Çelebi Mehmed Bey el-cündî ve Kavukcu Mehmed Çelebi nâm kimesneler meclis-i şer‘a gelip ihbâr eylediklerinde hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri mezbûr Mustafa Efendi’nin zamân-ı ifâkatine değin beher yevm ikişer buçuk akçe verilmek üzere merkūm Hızır Halîfe’yi hizmet-i hitâbet-i mezbûreyi râ‘î olmak üzere câmi‘-i mezbûrda kāimmakām nasb ve ta‘yîn ol dahi kabûl ve hizmet-i lâzımesin kemâ-yenbagī edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-eşbâh Ahmed Ağa emîn-i ganem, el-Hâc Ahmed b. Mahmud, Abdi Çelebi b. Hüseyin, Mustafa Çelebi b. İsa ve gayruhum.