İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 705 Hüküm no: 844 Orijinal metin no: [107a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumcu Mahmud Beşe b. Mustafa’nın alacak hususunda Mehmed Ağa b. Abdurrahman ile sulh oldukları Sulh, ibrâ. Dergâh-ı âlî yeniçerilerinden olup Ağa Kapısı’nda mumcu olan Mahmud Beşe b. Mustafa nâm kimesne meclis-i şer‘de işbu bâ‘isü’l-kitâb Mehmed Ağa b. Abdurrahman nâm kimesne mahzarında ikrâr ve takrîr-i kelâm edip mezbûr Mehmed Ağa bir husûs için on bin akçe ücret ile Vilâyet-i Anadolu’da Kastamonu kasabasına varıp gelince beni istîcâr ben dahi nefsimi îcâr edip hizmetini edâ eylediğimden sonra ücret-i mezbûreden bin beş yüz akçesini mezbûr Mehmed Ağa’nın yedinden ahz u kabz edip meblağ-ı bâkī sekiz bin beş yüz akçemi bundan akdem mezbûr Mehmed Ağa’dan taleb eylediğimde ol dahi ücret-i mezbûru bi’t-tamam sana edâ ve teslîm eyledim deyü def‘le mukābele ve ben dahi sekiz bin beş yüz akçeyi ahz u kabz eylediğimi inkâr ol dahi müdde‘âsını isbât sadedinde olmağla beynimizde münâza‘ât-ı kesîre vâkı‘a olmuş idi el-hâletü hâzihî vesâtet-i muslihîn ile da‘vâ-yı meşrûhumdan mezbûr Mehmed Ağa benimle bin beş yüz akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh-ı mezbûru mezbûr Mehmed Ağa yedinden tamamen alıp kabz edip mâ‘adâdan târih-i kitâba gelince cemî‘ da‘vâdan mezbûr Mehmed Ağa’nın zimmetini ibrâ ve ıskāt eyledim ba‘de’l-yevm husûs-ı mezbûra ve gayra müte‘allika mezbûr Mehmed Ağa ile da‘vâ ve nizâ‘ım kalmadı deyip da‘vâ dahi sudûr ederse lede’l-hükkâm mesmû‘a olmasın dedikde gıbbe’t-tasdîk mâ-vaka‘a bi’t-taleb ketb olundu. Fi’l-hâmis aşer min-Zilka‘de li-sene isneteyn ve seb‘în ve elf. Şuhûdü’l-hâl: Abdülbaki b. Şaban el-mübâşir, Mustafa Çelebi b. Mehmed, Mustafa b. Hüseyin, Hasan b. Sefer, Halil b. Musa, Ali Beşe b. Davud, İbrahim b. Nasuh, Ali b. Mustafa.