İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 705 Hüküm no: 845 Orijinal metin no: [107a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçük Mehmed Beşe’nin Yorgi v. Vasil tarafından zabtolunan terekesinin ebeveyni Durmuş b. İlyas ile Aliye bt. Abdullah’a teslimi Nakl, vürûd. Vilâyet-i Anadolu’da Trabzon Sancağı’nda Sürmene Kazâsı Kādısı Yusuf Efendi b. Mahmud kıbelinden unvânı ile mu‘anven ve hatmi ile mahtûm ve bin yetmiş iki senesi Ramazan’ı gurresiyle müverrah kitâb-ı nakli vârid olup mazmûnunda kazâ-i mezbûra tâbi‘ Mahora nâm karye sükkânından Durmuş b. İlyas ile Aliye bt. Abdullah nâm hatundan ber-vech-i âtî da‘vâ-yı sahîha ile mesbûk istişhâd-ı şer‘î sudûrundan sonra kazâ-i mezbûrede sâkin el-Hâc Mehmed b. Mahmud b. Kurd ve Ali Çelebi b. Mahmud b. Kara Ali Çavuş nâm kimesneler li-ecli’ş-şehâde mahâll-i cerh ve ta‘dîl olan meclis-i şer‘a hâzırân olup gıbbe’l-istişhâdi’ş-şer‘î bundan akdem İstanbul’da sâkin iken vefât edip terekesi Yorgi v. Vasil nâm zimmî yedinde mazbûta olan Küçük Mehmed Beşe’nin müsteşhed-i mezbûr Durmuş babası ve müsteşhede-i merkūme Âliye Hatun vâlidesi olup verâseti mezbûrâna münhasıradır bunlardan gayrı vârisi ve terekesine müsahıkk-ı âhar olduğu ma‘lûmumuz değildir biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyeti şerâ’iti’’l-kabûl şehâdetleri makbûle oldukdan sonra mezbûre Âliye Hatun müteveffâ-yı mezbûrdan kendiye ırsen intikāl eden sülüs hissesini tereke-i müteveffâ-yı mezbûra vâzı‘u’l-yed olanlardan da‘vâ ve taleb ve ahz u kendiye îsâl ve teslîme ve îsâl mütevakkıf olduğu umûrun cümlesine zevci mezbûr Durmuş’u vekîl nasbeyledikde ol dahi kabûl eylediğini hâvî olmağın kitâb-ı mezbûr merkūm zimmî muvâcehesinde kırâet ve istintâk olundukda tereke-i müteveffâ-yı mezbûra vaz‘-ı yedini ikrâr lâkin mevlânâ-yı mezbûr kıbelinden vürûdunu inkâr edicek müsteşhed-i mezbûr Durmuş’dan müdde‘âsı için beyyine taleb olundukda zeylinde olan tarîk şâhidleri Ali Çelebi b. Eyüb Beşe ve Derzibaşı el-Hâc Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâdi’ş-şer‘î fi’l-vâki‘ kitâb-ı mezbûr hâlâ kādı-i merkūm Yusuf Efendi’nin olup zeylinde olan hat ve zahrında olan hâtem mevlânâ-yı mezbûrundur huzûrumuzda imzâ ve mühürleyip hat ve hâtemine bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm müteveffâ-yı mezbûr Küçük Mehmed Beşe’nin bi’l-emâne yedinde olan terekesini asâleten ve vekâleten mezbûr Durmuş’a teslîme mezbûr Yorgi’ye tenbîh olunup mâ hüve’l-vâki‘ bi’t-taleb ketb olundu. Fi’s-sâdis aşer min-Zilka‘deti’ş-şerîfe sene 1072. Şuhûdü’l-hâl: Musa Beşe b. Cafer, Mustafa Beşe b. Mahmud, Hüseyin Efendi el-kâtib, Sinan Beşe b. Mustafa, Ahmed Çelebi b. Mahmud.