İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 711 Hüküm no: 854 Orijinal metin no: [108a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Sirkecibaşı Mehmed Ağa’nın Rus asıllı kölesi Şahin’i hayatta iken azat edip kendisine üç bin akçe verilmesini vasiyet ettiği İsbât-ı ıtk. Husûs-ı âti’l-beyânın mahâllinde tahrîr ve istimâ‘ı iltimâs olunmağın kıbel-i şer‘den Mevlânâ Mehmed Efendi irsâl olunup ol dahi mahmiye-i İstanbul’da Âşık Paşa mahallesinde Yahya Paşazâde Sarayı demekle ma‘rûf menzile varıp zeyl-i kitâbda mastûrü’l-esâmî Müslimîn huzûrunda akd-i meclis-i şer‘-i eyledikde işbu açık kaşlı elâ gözlü Rusiyyü’l-asl Şahin b. Abdullah bundan akdem maktûlen vefât eden Sirkecibaşı Mehmed Ağa’nın zevce-i metrûkesi Hadîce bt. Abdullah tarafından da‘vâ-yı âtiyyede husûmet ve redd-i cevâba sâbitü’l-vekâle vekîl olup hâlâ zevci Hüseyin Ağa b. Abdullah mahzarında üzerine da‘vâ ve takrîr-i kelâm edip ben müteveffâ-yı mezbûrun abd-i memlûkü olup hâlâ sıhhatinde beni i‘tâk edip hür olduğumdan sonra bana üç bin akçe dahi vasiyyet eylemişken zevce-i metrûkesi mezbûre Hadîce rıkkı olmak üzere beni zabteder suâl olunup sebîlim tahliye olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan sıdk-ı makālini mübeyyine beyyine taleb olundukda udûl-i Müslimînden Salih Efendi b. Mehmed ve Abdülkerim Çelebi b. Mehmed li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i mezbûr Şahin mevlâsı Mehmed Ağa hâl-i sıhhatinde bizim huzûrumuzda i‘tâk eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra mevlânâ-yı mezbûr vâki‘ hâli mahâllinde tahrîr ve istimâ‘ edip ve mûcebince müdde‘î-i mezbûrun ıtkına hüküm ve vasiyyet eylediği meblağ-ı mezbûr terekesinden müdde‘î-i mezbûra edâya tenbîh eyledikden sonra meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ârif Mehmed Efendi, es-Seyyid Lütfullah, el-Hâc Mahmud [b.] Abdullah, Yusuf Efendi [b.] Osman, Mehmed Ağa [b.] Abdullah, Mustafa [b.] Şaban, İsmail [b.] Receb, Sefer Efendi [b.] Mehmed, Mustafa [b.] Fazlullah.