İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 712 Hüküm no: 855 Orijinal metin no: [108a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fazlı Bey b. Abdullah’ın küçük kızı Ayşe için ödediği günlük altı akçe nafaka miktarının iki akçeye indirildiği Tenzîl-i nafaka. Mahmiye-i İstanbul’da ( ) mahallesi ahâlîsinden Fazlı Bey b. Abdullah meclis-i şer‘de zevce-i mutallakası Fâtıma bt. Fazlı Bey nâm hatun mahzarında takrîr-i kelâm edip mezbûre Fâtıma Hatun bi-hakkı’l-hıdâne hacr ve terbiyesinde olan sulbiye sagīre kızım Âişe için bundan akdem üzerime yevmî altı akçe nafaka takdîr etdirip lâkin ben fakīr olup yevmî altı akçe nafakayı vermeğe iktidârım olmamağla dört akçesi hat olunmak matlûbumdur dedikde fi’l-vâki‘ beher yevm altı akçe nafakayı vermeğe mezbûrun iktidârı olmayıp fakīr olduğu sikât-ı Müslimîn haber verdiklerinden sonra mezbûrenin rızasıyla meblağ-ı mezbûrun dört akçesi hat ve savb-ı şer‘den sagīre-i mezbûre için mezbûr Fazlı Bey üzerine yevmî iki akçe nafaka takdîr olunup vakt-i zarûretde istidâne ve sagīre-i merkūmeye sarfa ve lede’z-zafer mezbûr Fazlı Bey’e rücû‘a izin verilip mâ-vaka‘a bi’t-taleb ketb olundu. Fî 13 min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Hüseyin Efendi el-Burûsî, Receb Çavuş el-mübâşir, Abdi b. Hüseyin, Yıldırım Çavuş b. ( ) el-mübâşir, Mehmed Çelebi b. Ali, Hasan b. Ali, Şükrullah b. Mustafa.