İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 713 Hüküm no: 856 Orijinal metin no: [108b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri Mehmed b. Ali’nin, Abdullah Efendi b. Mehmed’in kendisinden rüşvet aldığına dair iddiasını ispat edemediği Dergâh-ı âlî yeniçerilerinden Mehmed b. Ali nâm râcil meclis-i şer‘-i hatîrde sâbıkā yeniçeri ocağında kethudâyeri kâtibi olan işbu râfi‘u’l-kitâb umdetü ashâbi’t-tahrîr ve’l-kalem zübdetü erbâbü’t-takrîr ve’r-rakām Abdullah Efendi b. Mehmed mahzarında üzerine da‘vâ ve takrîr-i kelâm edip bundan akdem Babadağı serdârlığın aldığımda mezbûr Abdullah Efendi’ye bi-tarîkı’r-rüşve yetmiş kıt‘a esedî guruş vermişdim taleb ederin suâl olunsun dedikde gıbbe’s-suâl mezbûr Abdullah Efendi cevâbında müdde‘î-i mezbûr rızâsı ile meblağ-ı mezbûru bana hîbe ve teslîm ve ben dahi meclis-i hîbede ittihâb ve tesellüm ve kabûl ve mesârıfıma sarf ve harc eyledim hatta rızâsı ile meblağ-ı mezbûru bana hîbe ve teslîm eyledim deyip bundan akdem huzûr-ı Müslimînde ikrâr ve i‘tirâf ve işhâd dahi eylemişdir deyü def‘le mukābele edecek akībe’l-istintâk ve’l-inkâr mezbûr Abdullah Efendi’den hîbe-i mezbûreyi mübeyyine beyyine taleb olundukda udûl-i ricâl-i Müslimînden Süleyman Beşe b. İbrahim ve el-Hâc Mahmud b. Ali nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i mezbûr Mehmed Beşe bundan akdem bizim huzûrumuzda mezbûr Abdullah Efendi’ye rızâm ile yetmiş esedî guruş hîbe ve teslîm eyledim deyü ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-yı şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle olmağın mûcebince müdde‘î-i mezbûr mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Osman Beşe b. el-Hâc Evran 37. [bölü]k, Hüseyin Beşe b. ( ), Hüseyin b. Abdullah, Mehmed b. Receb, Süleyman Beşe b. Abdi 37. [bölü]k.