İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 713 Hüküm no: 857 Orijinal metin no: [108b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koyun Sayıcısı Dimo v. Todori’nin alacak hususunda Eski Saray Kasapbaşı Dimitraki v. Yani ile sulh olduğu Sulh, ibrâ. Mahmiye-i İstanbul’da ( ) mahallesinde sâkin Dimo v. Todori nâm zimmî meclis-i şer‘de Eski Saray kasabbaşısı olan bâ‘isü’s-sifr Dimitraki v. Yani nâm zimmî muvâcehesinde ikrâr ve i‘tirâf edip mezbûr Dimitraki’nin ben koyun sayıcısı olmağla ücretim mukābelesinde benim hisseme â’id olup adedi beynimizde ma‘lûm koyunu altı ve derisi semenlerinden kendi mesârifine sarf ile bana zimmetinde deyni olan kırk beş bin dokuz yüz altmış akçe ve emriyle koyun çobanlarına ve rûznâmçe harcına ve bâcdâra verdiğim on üç bin sekiz yüz akçe ki cem‘an elli dokuz bin yedi yüz altmış akçemi mezbûr Dimitraki’den da‘vâ ve taleb etmiş idim el-hâletü hâzihî tavassut-ı muslihîn ile da‘vâ-yı mezbûreden mezbûr Dimitraki benimle on sekiz bin akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr on sekiz bin akçemi merkūm Dimitraki yedinden ahz u kabz edip ma‘adan mezbûrun zimmetini ibrâ-i âm ile ibrâ ve ıskāt eyledim ba‘de’l-yevm husûs-ı mezbûra müte‘allika merkūm Dimitraki ile vechen mine’l-vücûh ve sebeben mine’l-esbâb da‘vâ ve nizâ‘ım ve alâka ve medhalim kalmadı da‘vâ dahi edersem lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mefharu’l-eşbâh Şahin Çavuş b. ( ), Ali Ağa b. ( ), Mehmed Ağa ser-muhzırân, el-Hâc Ahmed b. Mahmud, Abdi b. Hüseyin, Mehmed b. Ramazan, Hasan b. Bayram.