İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 714 Hüküm no: 858 Orijinal metin no: [108b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Hasan’ın kendisine herhangi bir para ve eşya teslim etmediğine dair Ömer b. Mustafa’nın yemin ettiği Hüccet-i yemîn. Vilâyet-i Anadolu’da Kastamonu Sancağı’nda Devrekânî kazâsına tâbi‘ Karaköy nâm karyeden Hüseyin b. Hasan nâm kimesne tarafından husûs-ı câ’i’z-zikre vekîl-i sâbitü’l-vekâlesi olan babası mezbûr Hasan meclis-i şer‘de işbu râfi‘u’l-vesîka Ömer b. Mustafa mahzarında üzerine da‘vâ ve takrîr-i kelâm edip oğlum mezbûr Hüseyin’in karz-ı şer‘îden yüz kıt‘a riyâlî guruş hakkı ve bi-tarîkı’l-vedî‘a yirmi guruş kıymetli bir boylu tüfenk ve yedi yüz akçe kıymetli bir serhaddî ve sekiz yüz akçe kıymetli bir sîm kılıç ve iki sagīr tabanca tüfenk mezbûr Ömer’e teslîm eylemişdi hâlâ meblağ-ı mezbûr ile eşyâ-i mezkûremi bi’l-vekâle mezbûr Ömer’den taleb ederin suâl olunsun dedikde gıbbe’s-suâl ve’l-inkâr vekîl-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin zimmetinde müvekkil-i mezbûra karzdan yüz kıt‘a riyâlî guruş ile bi-tarîkı’l-vedî‘a eşyâ-i mezbûreyi müvekkil-i mezbûr yedinden ahz u kabz etmediğine mezbûr Ömer’e yemîn teklîf olundukda ol dahi alâ-vefki’l-mesûl halfü billâhi te‘âlâ etmeğin bilâ-beyyine mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc Ahmed b. Mahmud, Şükrullah b. Mustafa, Veli b. Mahmud, Mustafa b. İsa, Gazanfer b. Tevekkül.