İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 715 Hüküm no: 859 Orijinal metin no: [108b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağ Hacı Mehmed b. Hacı Abdülkadir’in muhalefet etmemeye ve debbağlar kethudalığına talip olmamaya söz verdiği Hüccet-i tâife-i debbağ, muhâlefet etmemeğe ta‘ahhüd. Mahmiye-i İstanbul’da debbağlar hirfetinin ahî babaları Seyyid Ali b. es-Seyyid Süleyman ve kethudâları el-Hâc Salih ve Zülfikar Çelebi ve el-Hâc Mehmed b. Osman ve Üstâd Ramazan ve Fazlı b. Murad ve Seyyid Mehmed b. Receb ve Mehmed b. el-Hâc Mustafa ve Mahmud Beşe b. Mustafa ve Mehmed Beşe b. Mustafa ve Seyyid Mustafa b. Seyyid Ali ve el-Hâc Mustafa ve sâirleri mahfil-i kazâda her biri takrîr-i kelâm edip yine tâife-i mezbûreden olup gāib ani’l-meclis el-Hâc Mehmed b. el-Hâc Abdülkadir nâm kimesne beynimizde olan mu‘âmelâtda bize muhâlefet eylediğinden gayrı kethudâlık uhdesinde gelmeğe iktidârı yoğiken kethudâlığa tâlib olmağla beynimizde ihtilâle bâ‘is olmuşdur kıbel-i şer‘den mahmiye-i mezbûre hısnı ebvâbından olup Yedikule hâricinde debbağhâneye varıp mezbûr el-Hâc Mehmed’in takrîri tahrîr olunmak matlûbumuzdur dediklerinde savb-ı şer‘den Mevlânâ Kehlî Mahmud Efendi irsâl olunup ol dahi zikrolunan mevzi‘a varıp akd-i meclis-i şer‘-i şerîf etdikde merkūm el-Hâc Mehmed mezbûrûn mahzarlarında kethudâlığa tâlib olmayıp ba‘de’l-yevm mezbûrûna muhâlefet etmemeğe ta‘ahhüd etmeğin vâki‘ hâli mevlânâ-yı [109a] mezbûr mahâllinde tahrîr ba‘dehû ma‘an irsâl olunan Mustafa Çelebi ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdülhalim Efendi b. Musa el-vâiz, Üstâd Ali b. Hürrem, Hüseyin Efendi el-imâm, Mustafa Efendi el-imâm, Ahmed b. Mustafa, Ahmed Çelebi b. el-Hâc Mustafa.