İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 715 Hüküm no: 860 Orijinal metin no: [109a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağ Hacı Mehmed b. Abdülkadir’in işyerinde usulsüz işler yapmamaya söz verdiği Eydan hüccet-i debbağ. Mahmiye-i İstanbul’da debbağlar hirfetinin ahî babaları Seyyid Ali b. Süleyman ve kethudâları el-Hâc Salih ve el-Hâc Rıdvan ve Muslı b. Murad ve Seyyid Mehmed b. Receb ve sâirleri mahfil-i kazâda her biri takrîr-i kelâm edip yine tâife-i mezbûreden olup mahmiye-i mezbûrede el-Hâc Cafer mahallesi sâkinlerinden gāib ani’l-meclis el-Hâc Mehmed b. Abdülkadir nâm kimesne Yedikule hâricinde vâki‘ debbağhânede olan kârhânesi içinde bir ocaklı oda ihdâs edip tâife-i mezbûrede hevâsına tâbi‘ bazı kimesneyi oda-i mezbûreye cem‘ ve her birine hiyel ta‘lîm edip kendi hâlinde olmamağla beynimizde küllî ihtilâle bâ‘is olmuşdur zikrolunan odanın üzerine varılıp keşf ve tahrîr olundukdan sonra ihdâs eylediği odada ancak debbağ eşyâsı vaz‘ edip âhardan kimesne getirmemeğe tenbîh olunmak matlûbumuzdur dediklerinde cânib-i şer‘-i mutahhardan Kehlî Mahmud Efendi irsâl olunup ol dahi tâife-i mezbûrûn ile el-Hâc Mehmed’in kârhânesine varıp akd-i meclis-i şer‘-i şerîf etdiklerinde zikrolunan odaya ba‘de’n-nazar merkūm el-Hâc Mehmed’in ahvâli teftîş ve tefahhus olundukda mahalle-i mezbûre sâkinlerinden Seyyid Ahmed Efendi el-imâm ve Zülfikar Çelebi ve el-Hâc Mehmed b. el-Hâc Osman ve Yazıcı Mehmed Çelebi b. ( ) ve es-Seyyid Mustafa Çelebi ve İsmail Çelebi b. Musa ve Ahmed Çelebi b. ( ) Ahîzâde ve Nasuh b. Mustafa ve Mehmed Beşe b. Bahşi ve İvaz b. Mahmud ve Ali b. Perviz ve Üstâd Mehmed b. Ahmed ve Ahmed Çelebi b. Mustafa ve el-Hâc Mustafa b. Mehmed ve Seyyid Mustafa Çelebi b. es-Seyyid Ali ve el-Hâc Halil b. el-Hâc Ahmed ve sâirleri merkūm el-Hâc Mehmed sulehâdan olup kendi hâlindedir deyü hüsn-i hâlini her birleri haber verdiklerinde mezbûr el-Hâc Mehmed dahi ba‘de’l-yevm zikrolunan odada ancak debbağ eşyâsı vaz‘ edip âhardan kimesne getirmemeğe ta‘ahhüd etmeğin vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa Çelebi ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdülhalim Efendi b. Musa el-vâiz, Üstâd Ali b. Muharrem, el-Hâc Halil b. Mehmed, Hasan Efendi b. Mustafa el-imâm, Ahmed Beşe b. Mustafa, Mustafa Beşe b. Mahmud.