İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 716 Hüküm no: 861 Orijinal metin no: [109a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mehmed’in, merhume Rabia bt. İbrahim’in varislerinden birisi olduğunu şahitlere ispat ettiği İsbât-ı verâset. Muhâsebeci efendi imzâsıyladır. Mahrûse-i Galata muzâfâtından İstinye nâhiyesine tâbi‘ Rumelihisarı’nda Bebek mahallesi sâkinelerinden işbu râfi‘atü’l-vesîka Emine bt. Mehmed nâm hatun mahfil-i kazâda mahalle-i mezbûrede sâkine iken bundan akdem vefât eden Râbia bt. İbrahim nâm hatunun zevci ve cemî‘ terekesine vâzı‘u’l-yed olan Derviş Ali Çelebi b. Eyüb mahzarında üzerine takrîr-i da‘vâ edip ben müteveffât-ı mezbûre Râbia’nın vâlidesi Hadîce bt. Hasan Asmad nâm hatunun li-ebeveyn hâli kızı ve zât-ı rahm cihetinden vârisesi olup zîrâ mezkûre Hadice’nin vâlidesi Aynî Hatun ile babam mezkûr Mehmed li-ebeveyn karındaşlardır babaları İbrahim b. Abdullah ve anaları Âişe nâm hatun ve maskat-ı re’sleri zikrolunan Bebek mahallesidir müteveffât-ı mezkûre Râbia’nın verâseti bana ve zevci mezkûr Derviş Çelebi’ye ve nısf-ı âharı bana isâbet ve intikāl etmiş iken mezkûr Derviş Çelebi vaz‘-ı yed eylediği cemî‘ tereke-i müteveffât-ı mezkûreden nısf hissemi bana teslîme ta‘allül eder suâl olunup teslîme mezbûra tenbîh olunmak matlûbumdur dedikde gıbbe’s-suâl mezbûr Derviş Çelebi cevâbında cemî‘ tereke-i müteveffât-ı mezbûre[ye] vaz‘ eylediğini ikrâr lâkin vech-i muharrer üzere verâseti inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup mahalle-i mezbûre sükkânından umdetü’l-emâsil ve’l-a‘yân Mustafa Ağa b. Mehmed ve Müstahfız Mehmed Bey b. Abdi ve Rıdvan Beşe b. Abdullah ve Mustafa Efendi b. Mehmed nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ işbu müdde‘iye Emine Hatun bt. Mehmed müteveffât-ı mezbûre Râbia bt. İbrahim’in vâlidesi Hadîce bt. Asmad nâm hatunun li-ebeveyn hâli kızı ve zât-ı rahm cihetinden vârisesi olup zîrâ müteveffât Râbia’nın vâlidesi mezkûre Hadice’nin vâlidesi Aynî Hatun ile müdde‘iye-i mezbûre Emine’nin babası Mehmed li-ebeveyn karındaşlardır babaları İbrahim b. Abdullah ve anaları Âişe nâm hatun ve maskat-ı re’sleri mahalle-i mezbûredir müteveffât Râbia’nın verâseti müdde‘iye-i mezbûre ile mezkûr Derviş Çelebi’ye münhasıradır bunlardan gayrı vârisi ve terekesine müstahıkk-ı âhar olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde şuhûd-ı mezkûrdan zeyl-i kitâbda isimleri mastûr olan Müslimîn ile ta‘dîl ve tezkiye olunduklarından sonra şehâdetleri makbûle olmağın mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Çelebi b. Hasan, Mumcu İbrahim Beşe b. ( ), İvaz Efendi b. Şaban, Mahmud Çelebi b. Mustafa, Halil b. Mehmed, Hasan Bey b. Abdullah, Ahmed b. Musa, Ahmed Efendi b. Mehmed, İsmail Çelebi b. Murad.