İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 717 Hüküm no: 862 Orijinal metin no: [109a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maktul İbrahim Paşa Camii Vakfı mürtezikalarının maaş hususunda mütevelli Ahmed Efendi’nin zimmetinin ibra edildiği Vilâyet-i Rumeli’nde Niğbolu Sancağı’nda Hezargrad kasabasında vâki‘ merhûm Maktûl İbrahim Paşa[‘nın] binâ eylediği câmi‘-i şerîfde vâ‘iz olan fahrü’s-sâlikîn Şeyh Halil Efendi b. Süleyman ve İmâm Mehmed Efendi b. Ali ve evkāf-ı mezbûre nâzırı Mahmud Çelebi b. Ahmed Ağa ve câbîleri Ömer ve Fazlullah ve kâtibleri Mehmed Çelebi ve Mustafa ve sâir mürtezikaları meclis-i şer‘de bi’l-fi‘il vakf-ı mezbûr mütevellîsi olan fahrü’l-emâcid ve’l-a‘yân râfi‘u’l-kitâb Ahmed Efendi b. Süleyman mahzarlarında her biri ikrâr ve takrîr-i kelâm edip merhûm-ı müşârün-ileyhin vakfiye-i ma‘mûlün-bihâsında mastûr olduğu üzere kasaba-i mezbûrede hâkimü’ş-şer‘ olanlara vakf-ı mezbûrun nezâreti meşrûta olmağın kasaba-i mezbûrede bin yetmiş ve yetmiş bir ve yetmiş iki senelerinde hâkim-i şer‘-i mübîn olanların nezâretleri hasebiyle mütevellî-i mezbûr Ahmed Efendi’nin muhâsebesi görülüp işbu yedinde olan memhûr muhâsebe defterleri nâtık olduğu vech üzere ber-mûceb-i şart-ı vâkıf her birimiz vazîfe-i mu‘ayyenelerimizi mütevellî-i mezbûr yedinden bi’t-tamam alıp kabz edip sinîn-i mezkûrede hâsıl olan mal-ı vakfdan mezbûr Ahmed Efendi yedinde bir akçe ve bir habbe kalmadı dediklerinde gıbbe’t-tasdîk mâ-vaka‘a bi’t-taleb ketb olundu. Fî 16 min-Zilka‘de li-sene isneteyn ve seb‘în ve elf. Şuhûdü’l-hâl: Şeyh Mehmed Eendi b. İbrahim, Halil Efendi el-vâiz, Mehmed Efendi el-imâm, Mehmed Çelebi el-kâtib, Mehmed Çelebi en-nâzır, Hasan Çavuş, Ebûbekir Çelebi b. ( ) el-cündî, Mehmed Beşe b. İsa, Mustafa Çelebi el-kâtib, Receb Hoca el-müezzin, Hüseyin Hoca el-kâtib.