İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 718 Hüküm no: 863 Orijinal metin no: [109b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Saray Kasapbaşı Dimitraki v. Yani tarafından koyun satın almak üzere vekil tayin edilen Dimola v. Totoş’un muhasebesini verdiği Eski Saray kasabbaşısı olan Dimitraki v. Yani zimmî meclis-i şer‘de koyun sayıcısı bâ‘isü’s-sifr Dimola v. Totoş nâm zimmî muvâcehesinde ikrâr ve i‘tirâf edip târih-i kitâbdan üç sene mukaddem gāibûn ani’l-meclis Demirhisar kasabasında sâkin Hasan Bey zimmetinde iki yüz on bin akçe ve Kerpiniş nâm kasabada sâkin Mehmed Ağa zimmetinde yüz seksen bin akçe ve Şehirköyü nâm kasabada sâkin Mahmud Ağa zimmetinde altı yük elli beş bin akçe ve Serfiçe nâm kasabada sâkin Mehmed Ağa zimmetinde yüz yedi bin akçe ve Eğribucak nâm kasabada sâkin Mustafa Bey zimmetinde yirmi bin yüz kırk iki akçe ve Nevrekoblu Sâdık Bey zimmetinde yüz altmış dört bin akçe hakkım olup mezbûrûndan hukūkumu kabza mezbûru vekîl ol dahi ba‘de kabûlü’l-vekâle mezbûrûndan meblağ-ı mezbûrun mecmû‘unu kabz edip yedlerine temessük verdikden sonra meblağ-ı mezbûrun mecmû‘una bana koyun iştirâ edip teslîm etmekle muhâsebesini vermiş idi el-hâletü hâzihî mezbûrûndan biri gelip verdiği meblağı mezbûr Dimola’dan taleb ve ahz ederse ben zâmin ve kefîl oldum dedikde gıbbe’t-tasdîkı’ş-şer‘î. Fi’l-yevmi’t-tâsi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Şahin Çavuş b. ( ), Ali Ağa b. ( ), el-Hâc Ahmed b. Mahmud, Abdi b. Hüseyin, Rasûl b. Rıdvan, Hüseyin b. Bayram, Mehmed b. Ramazan, Mustafa b. İsa.