İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 718 Hüküm no: 864 Orijinal metin no: [109b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasım Ağa Vakfı mütevelli kaymakamı İsmail b. Ali’nin azli ile yerine Şeyh İvaz Efendi’nin tayini Nasb-ı tevliyet-i kāimmakām-ı vakf-ı Kasım Ağa. Mahmiye-i İstanbul’da Edirnekapısı kurbünde vâki‘ Perâkende-i Kasım Ağa Vakfı’nın kāimmakām-ı mütevellîsi olan İsmail b. Ali nâm kimesnenin muhâsebesi görüldükde vakf-ı mezbûrdan olup Havâss-ı Refî‘a muzâfâtından Oklağlı nâm karye mahsûlünü beher sene ziyâde ile der-uhde ederken defter-i vakfa onar bin akçe tahrîr edip ve İstanbul’da olan evkāfından yoğurtçu ve ağdacı dükkânları ferâğından zimmetinde defter-i vakfa kaydolunmamış iki bin beş yüz akçe zuhûr etdiğinden mâ‘adâ vakf-ı mezbûrdan olup vâkıf-ı mezbûrun mescidi kurbünde vâki‘ bahçeyi mu‘accele ve mü’eccelinden nâkıs ile kendi üzerine etdirip bir vechile vakf-ı mezbûra küllî gadri olduğu lede’ş-şer‘ zâhir ve müte‘ayyin olmağın mezbûr İsmail kāimmakāmlıkdan azl olunup yerine işbu bâ‘isü’l-kitâb umdetü’s-sâlikîn zübdetü’l-vâsılîn eş-Şeyh İvaz Efendi b. İshak kıbel-i şer‘den kāimmakām nasb ve ta‘yîn olundukda ol dahi kabûl ve merâsimini edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevm ( ) Zilka‘detü’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Çelebi b. Mahmud, Ali Ağa b. Oruc, Abdi b. Hüseyin, Muharrirü’l-hurûf Kehlî Mahmud, Mustafa el-muhzır, Seyyid Cafer b. ( ), Seyyid Mehmed b. Seyyid Cafer, İbrahim b. Mahmud, İbrahim Dede el-kayyum, Mehmed b. el-Hâc Hasan ve gayruhum.