İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 719 Hüküm no: 865 Orijinal metin no: [109b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum İbrahim Ağa b. Kasım’ın vasiyetini yerine getirmeyen Mustafa Çelebi’nin üzerine Mehmed Beşe b. Hanefi’nin vasî tayin olunduğu Vesâyet. Mahmiye-i İstanbul’da Soğan mahallesinde sâkin iken bundan akdem maktûlen fevt olan İbrahim Ağa b. Kasım’ın vasîyy-i muhtârı olan Mustafa Çelebi b. Ali vesâyet uhdesinden gelmeğe kādir olmadığından nâşî müteveffâ-yı mezbûrun vücûh-ı hayrâta sarf için vasiyyet eylediği kırk bin akçe i‘mâl olunmayıp meblağ-ı mezbûr i‘mâl olunmak için mezbûr Mustafa Çelebi üzerine zamm-ı vasî nasb olunmak mühim olmağın hâkim-i muvakkı‘-ı sadr-ı kitâb hazretleri işbu bâ‘isü’r-rakīm Mehmed Beşe b. Hanefî’yi zamm-ı vasî nasb ve ta‘yîn eyledikde ol dahi vesâyet-i mezbûreyi kabûl ve hizmet-i lâzımesini edâya ta‘ahhüd etdikden sonra mezbûr Mehmed Beşe meclis-i mezbûrda merkūm Mustafa Çelebi mahzarında ikrâr ve i‘tirâf edip meblağ-ı mezbûru irbâh için merkūm Mustafa Çelebi bana teslîm edip ben dahi yedinden bi’t-tamam ahz u kabz eyledim dedikde mâ-vaka‘a bi’t-taleb ketb olundu. Fî 21 min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Efendi b. Mustafa el-imâm, Ahmed Çelebi b. Mehmed Efendi, Ömer Bey b. Hamza, Ali Çelebi b. Şehabeddin, Mehmed Çelebi b. Nasuh, Mustafa Efendi b. Ali.