İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 720 Hüküm no: 866 Orijinal metin no: [109b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş b. Ali’nin, kendisi ve esirleri için herhangi bir harcama yapması için Esirci Hacı Musa b. Mehmed’e emir vermediğine yemin ettiği Yemîn. Mahmiye-i İstanbul’da esirci tâifesinden el-Hâc Musa b. Mehmed nâm kimesne mahfil-i kazâda yine tâife-i merkūmeden işbu bâ‘isü’l-kitâb Derviş b. Ali mahzarında üzerine da‘vâ ve takrîr-i kelâm edip târih-i kitâbdan iki ay mukaddem mezbûr Derviş hasta olup kendinin emri ile üç re’s esirlerinin me’kûlât, meşrûbâtlarına on dört guruş ve esirleri için ikişer guruşa iki semmûr kalpak ve beş guruşa bir muhattem kuşak cem‘an yirmi beş guruş harc u sarf eyleyip ba‘dehû zikrolunan kalpakları ve kuşakları ahz u kabz eyledim hâlâ me’kûlâtlarına harc eylediğim on dört guruş masrûfumu mezbûr Derviş’den taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin mezbûr Derviş esirleri ile kendi için ber-minvâl-i muharrer me’kûlât [ve] meşrûbâtlarına on dört guruş harc eyle deyü müdde‘î-i mezbûra emretmediğine yemîn teklîf olundukda ol dahi hasbe’l-mesûl yemîn billâhi te‘âlâ etmeğin müdde‘î-i mezbûr bilâ-beyyine mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdi b. Hüseyin, Veli b. Mahmud, Rasûl b. Rıdvan, Ahmed b. Abdülcabbar, Şükrullah b. Mustafa.