İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 725 Hüküm no: 872 Orijinal metin no: [110b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Abdullah’ın ölen oğlu Mustafa’nın ticarî şirketteki anaparasını ortaklarından tahsil ettiği Asl-ı mâl ve fâideden bi’t-tamam alıp kabzını ikrâr. Vilâyet-i Rumeli’nde Ruscuk kasabasında sâkin iken bundan akdem fevt olan Mustafa nâm kimesnenin babası ve hasran vârisi Yusuf b. Abdullah meclis-i şer‘de müteveffâ-yı mezbûrun şerîkleri Rasûl Beşe b. Mehmed ve Ömer Beşe b. Mehmed mahzarlarında ikrâr ve i‘tirâf edip müteveffâ-yı mezbûr merkūmân ile şirket-i inân ile şerîkler olmağla müteveffâ-yı mezbûrun asl-ı mâlı olan on sekiz bin akçeyi mezbûrân yedlerinden verâsetim hasebiyle bi’t-tamam ahz u kabz edip asl-ı mâl ve fâideden mezbûrân yedlerinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Sâbıkūn.