İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 725 Hüküm no: 873 Orijinal metin no: [111a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kethudayeri Mehmed Ağa b. Muslihiddin’e tasarrufunda olan vakıf arsası üzerine bina yapmasına izin verildiği Dergâh-ı âlî yeniçerileri ocağından hâlâ kethudâyeri olan umdetü’l-emâcid ve’l-ekârim câmi‘ü’l-mehâmid ve’l-mekârim Mehmed Ağa b. el-merhûm Muslihiddin taraf-ı bâhirü’ş-şereflerinden husûs-ı âtîde sâbitü’l-vekâle vekîl-i şer‘îleri olan umdetü’l-kuzâtü’l-İslâm zübdetü vülâti’l-enâm Gümüşîzâde demekle şehîr Yahya Efendi b. Mehmed Efendi meclis-i şer‘de bi’l-vekâle takrîr-i kelâm edip mahmiye-i İstanbul’da Hoşkadem mahallesinde vâki‘ bir tarafı Medîne-i Münevvere Vakfı’na iki tarafı müvekkil-i mûmâ-ileyh mülküne ve bir tarafı tarîk-i hâssa müntehî menzil icâre-i mu‘accele ve mü’eccele-i ma‘lûmeteyn ile müvekkilim mûmâ-ileyh Mehmed Ağa’nın taht-ı tasarrufunda iken bin yetmiş Zilka‘desi’nin on altıncı gününde vâki‘ harîk-i gālibde muhterik olup cânib-i vakıfdan binâya müsâ‘ade olmamağla icâre-i mu‘accelesine mahsûb olmak üzere binâya tâlib dahi zuhûr etmeyip mukāta‘a ile âhara verilme lâzım geldikde senede yüz seksen akçe mukāta‘a ile yine mûmâ-ileyh Mehmed Ağa tâlib olup ziyâde ile tâlib-i âhar bulunmamağın hâlâ vakf-ı mezbûra mütevellî olan Seyyid İsmail Efendi bin yetmiş bir senesi Muharrem-i harâm gurresinde müvekkil-i mûmâ-ileyhe mukāta‘a-i mezbûre ile verip ve ihdâs etdikleri ebniye mülkleri olmak üzere binâya iznini hâvî temessük vermişdir işbu yedimde olan izin temessüküne ba‘de’n-nazar istihkâmen kıbel-i şer‘den hüccet verilmesi murâdımdır deyü târih-i mezbûr ile müverrah ve mütevellî-i mezkûrun imzâsıyla mümzât temessük ibrâz edip nazar olundukda mazmûnu min-zıllı’l-vücûh takrîr-i meşrûhuna muvâfık bulunmağın işbu varaka-i enîka alâ-mâ hüve’l-hakīka ketb ve yedlerine def‘ olundu. Fi’l-yevmi’s-sâlis ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdülfettah Efendi b. Muslihiddin el-kādî, Mustafa Efendi b. Yahya el-kādî, Seyyid Ali Efendi el-kādî, Esaid Çelebi b. Yahya Efendi el-müderris, Ahmed Ağa b. Abdullah, Şaban b. Mustafa, Mustafa Beşe b. Mehmed, Şemsi Beşe b. Mehmed.