İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 726 Hüküm no: 874 Orijinal metin no: [111a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah’ın kocası Hacı Ali b. Hasan’ın kendisini üç talak ile boşadığını ispat ettiği İsbât-ı talâk-ı selâse. Mahmiye-i İstanbul’da Derviş Ali mahallesi sâkinelerinden işbu râfi‘atü’l-kitâb Hadîce bt. Abdullah nâm hatun dîvân-ı sadrazamîde ma‘kūd meclis-i şer‘-i hatîr-i lâzımü’t-tevkīrde zevci el-Hâc Ali b. Hasan mahzarında üzerine da‘vâ ve takrîr-i kelâm edip bundan akdem mezbûr el-Hâc Ali’nin ben zevce-i menkûhası olup beni bundan akdem talâk-ı selâse ile tatlîk etmişdir. Suâl olunup takrîri tahrîr olunmak murâdımdır dedikde gıbbe’s-suâl mezbûr el-Hâc Ali müdde‘iye-i mezbûre zevce-i menkûhası olduğunu mukır lâkin talâk-ı selâse ile tatlîk eylediğini inkâr edicek müdde‘iye-i mezbûrenin müdde‘âsını mübeyyine beyyine taleb olundukda udûl-i Müslimînden olup yine mahalle-i mezbûre sâkinlerinden Abdi b. Mehmed ve Hasan b. Mehmed nâm kimesneler li-ecli’ş-şehâde hâzırân olup istişhâd olunduklarında fi’l-vâki‘ mezbûr el-Hâc Ali zevcem mezbûre Hadîce talâk-ı selâse ile benden mutallaka olsun deyü bundan akdem bizim huzûrumuzda zevcesi müdde‘iye-i mezbûreyi talâk-ı selâse ile tatlîk eyledi biz bu vechile mezbûre Hadice’yi merkūm el-Hâc Ali[‘nin] talâk-ı selâse ile tatlîk eylediğine şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde şâhidân-ı mezbûrânı mahallesi ahâlîsinden tezkiye için Mevlânâ Ahmed Efendi irsâl olunup ol dahi mahalle-i mezbûresine varıp akd-i meclis eylediğinde mahalle-i mezbûrede imâm olan Mehmed Efendi b. Abdullah ve Mehmed Halîfe b. Ahmed el-müezzin ve İbrahim Ağa b. Ali ve Mustafa Bey b. Osman ve diğer Mustafa Bey b. Osman ve Mehmed Ağa b. Osman ve Mehmed Çelebi b. Ahmed nâm kimesneler ve sâirlerinden suâl eyledikde onlar dahi şâhidân-ı mezbûrân adl ve makbûlü’ş-şehâdedir deyü her biri haber verdiklerini mevlânâ-yı mezbûr mahâllinde ketb ve tahrîr edip ba‘dehû ma‘an ba‘s olunan Mustafa b. Mehmed ve Hasan b. Mustafa ile meclis-i şer‘a gelip alâ-vukū‘ihî inhâ ve ihbâr etmeğin şâhidân-ı mezbûrânın şehâdetleri makbûle olmağın mâ-vaka‘a bi’t-taleb ketb olundu. Tahrîren fi’l-yevmi’s-sâmin aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Ağa b. Mahmud, Ahmed Ağa b. Mahmud, Şükrullah b. Mustafa, Mustafa Çelebi b. İsa, Abdi Çelebi b. Hüseyin ve gayruhum.