İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 727 Hüküm no: 875 Orijinal metin no: [111a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eskiden beri sadece Müslümanların yaşadığı Hacı Hüseyin mahallesinden gayrimüslimlerin çıkarılması Kefere tâifesinin Müslimîn mahallesinden ihrâcı keşfidir. Husûs-ı âti’l-beyânın mahâllinde keşf ve tahrîri bâbında fermân-ı âlî sâdır olmağın cânib-i şer‘den Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Samatya Kapısı kurbünde Hacı Hüseyin mahallesinde vâki‘ mescid-i şerîfe varıp akd-i meclis-i şer‘-i kavîm eyledikde mahalle-i mezbûre sükkânından Abdülbari Efendi b. Ali el-imâm ve Mustafa Halîfe b. Ramazan el-müezzin ve İsa Beşe b. Muharrem er-râcil ve el-Hâc Mustafa b. Veli ve İbrahim Çelebi b. İsmail ve Mehmed b. Mustafa ve Mehmed b. Süleyman ve Ömer b. Cemaleddin ve Yusuf b. Ali ve Mehmed Çelebi b. Abdi ve İbrahim Çelebi b. Mehmed nâm kimesneler meclis-i mezbûrda takrîr-i kelâm ve bast-ı merâm edip kefere tâifesinin başka mahalleleri olup bizim mahallemizde kadîmden bu ana dek zimmî tâifesi sâkin olagelmiş değil iken işbu meclisde hazır Koçı v. Koyun nâm zimmî mahallemizde Kapıcı Ahmed nâm kimesnenin zevcesinin menzilini iştirâ ve işbu Pandelin nâm zimmî dahi mahallemizde Hamza Çelebi nâm kimesnenin menzilini istîcâr ve Kirkos zimmî dahi mescid-i mezbûr mihrâbı kurbünde vâki‘ Ümmühani bt. Mehmed’in menzilini istîcâr ve bir menzilini dahi Meyrem? nâm Nasrâniye istîcâr ve Avadik v. Yanider nâm zimmî dahi Ali Çelebi’nin menzilini istîcâr ve Mehmed nâm müteveffânın veresesi menzillerini zimmî tâifesine îcâr ve Âişe Hatun dahi mahallemizde tasarrufunda olan menzili zimmî tâifesine îcâr etmeleri ile taklîl-i cemâ‘ate bâ‘is ve bâdî olduklarından mâ‘adâ her birimiz kefere tâifesinin akvâl-i fazîha ve ef‘âl-i şenî‘alarından ve sît [ü] sadâlarından her birimiz menzilimizde ibâdet ve tâ‘ât ve tilâvet-i Kur’ân edemeyip her hâllerinden müte’ezzîleriz suâl olunup mahallemizden ihrâc olunmak murâdımızdır dediklerinde gıbbe’s-suâl zimmîyûn-ı mezbûrûn cevâblarında fi’l-hakīka müdde‘iyyûn-ı mezbûrûnun mahalleleri kadîmden Müslim mahallesi olduğunu ve kendiler dahi Müslimîn menâzilinde sâkin olduklarını bi-tav‘ihim ikrâr eylediklerinde alâ-mûceb-i ikrârihim her birinin sâkin oldukları menâzil-i Müslimînden hurûcuna ba‘de’t-tenbîh mevlânâ-yı mezbûr vâki‘ hâli mahâllinde tahrîr ba‘dehû ma‘an ba‘s olunan Mehmed b. Ramazan ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Musâhib Osman Ağa, el-Hâc Mehmed b. Sinan, Mustafa b. Hüseyin, Mehmed b. Mustafa, Fazlı b. Abdurrahman, Fazlı b. Ahmed, Safiyyüddin b. Ahmed, Hacı Ali b. Abdullah, Sürücü Mehmed b. Abdullah, Mustafa Ağa b. ( ) el-cündî, Abdurrahman Çelebi b. Mustafa el-cündî, Zülfikar Çelebi b. Mustafa, Musa Çelebi b. İsa.