İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 728 Hüküm no: 876 Orijinal metin no: [111b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Bey b. Mustafa’nın Ömer Beşe b. Mustafa’ya emanet bıraktığı para ile zâyi olan atının bedelini tahsil edip zimmetini ibra ettiği Mahmiye-i İstanbul’da Elvanzâde mahallesi sâkinlerinden Hasan Bey b. Mustafa nâm kimesne meclis-i şer‘de işbu râfi‘u’l-kitâb Ömer Beşe b. Mustafa nâm kimesne mahzarında ikrâr ve takrîr-i kelâm edip mezbûr Ömer Beşe’ye bundan akdem yüz yetmiş beş şerîfî altın ile beynimizde ma‘lûm kırk esedî kıymetli bir atımı emânet vaz‘ ve teslîm ol dahi yedimden ber-minvâl-i muharrer ahz u kabz etmiş idi hâlâ meblağ-ı mezbûr yüz yetmiş beş altını ve zikrolunan atı zâyi‘ etmekle semeni olan kırk esedî guruşu mezbûr Ömer Beşe yedinden bi’t-tamam ahz u kabz eyledim meblağ-ı mezbûr yüz yetmiş altın ve mârrü’z-zikr at bahâsından mezbûr Ömer Beşe zimmetinde bir akçe ve bir habbe hakkım bâkī kalmadı dedidke mukırr-ı merkūm Hasan Bey’in minvâl-i muharrer üzere cârî ve sâdır olan ikrârını merkūm Ömer Beşe bi’l-muvâcehe tasdîk etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Şaban Efendi el-imâm, Abdullah Efendi el-müezzin, Mustafa Çelebi b. ( ), Mahmud Çelebi el-attar, Mumcu Mehmed Çelebi b. ( ), Mustafa Beşe b. ( ), Haydar Beşe b. ( ), Ahmed Çavuş b. ( ), Ahmed Çelebi berber, Mehmed b. Ramazan, Hasan Beşe çukadâr, Hasan Çelebi b. Halil, Mevlüd b. Mustafa, Ahmed Çelebi b. Muharrem.