İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 728 Hüküm no: 877 Orijinal metin no: [111b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçerilerin 56. Yayabaşı Odaları’na mahsus vakıf parasından aldığı borcunu ödemesi için Sendari v. İsdadi’ye tembihte bulunulduğu İkrâr-ı deyn ve teslîme tenbîh. Dergâh-ı âlî yeniçerilerinin elli altıncı yayabaşı odalarının nükūd-ı mevkūfesine bi’l-fi‘il mütevellî olan bâ‘isü’l-kitâb Hüseyin Odabaşı b. Ahmed mahfil-i kazâda zimmî tâifesinden Sendari v. İsdadi nâm zimmî muvâcehesinde üzerine da‘vâ ve takrîr-i kelâm edip mezbûr Sendari’ye târih-i kitâbdan yedi sene mukaddem mal-ı vakıfdan on bin akçe ikrâz ol dahi iktirâz ve kabz etmiş idi hâlâ meblağ-ı mezbûru taleb eylediğimde vermede ta‘allül eder suâl olunup alıverilmesi matlûbumdur dedikde gıbbe’s-suâl mezbûr Sendari cevâbında fi’l-vâki‘ kazıyye minvâl-i meşrûh üzere olduğunu bi-tav‘ihiikrâr ve i‘tirâf etmeğin ikrârı mûcebince meblağ-ı mezbûr on bin akçeyi mütevellî-i mezbûr Hüseyin Odabaşı’ya edâ ve teslîme mezbûr Sendari’ye tenbîh olunup mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Hasan Efendi el-müderris, Ahmed Beşe b. Mehmed, el-Hâc Hasan Beşe b. Mehmed, Yusuf Beşe b. Abdullah, Şükrullah b. Mustafa, Veli b. Mahmud.