İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 730 Hüküm no: 879 Orijinal metin no: [112a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Mehmed’in Hacı Küçük mahallesindeki bazı mülklerini annesi Merve bt. Kâbil Ağa’ya hibe ettiği Hüccet-i hîbe-i Merve Hatun. Husûs-ı âti’l-beyânın mahâllinde tahrîri iltimâs olunmağın kıbel-i şer‘den Mevlânâ Mehmed Efendi irsâl olunup ol dahi zeyl-i kitâbda mastûrü’l-esâmî olan Müslimîn ile mahmiye-i İstanbul’da Küçük Ayasofya mahallesi sâkinelerinden fahrü’l-muhadderât Merve bt. Kābil Ağa nâm hatunun sâkine olduğu menziline varıp akd-i meclis-i şer‘-i şerîf eyledikde mûmâ-ileyhânın sadriye kebîre kızı Afife bt. Mehmed nâm hatunun zâtını ma‘rifet-i şer‘iye ile ârifân olan İbrahim Çelebi b. Ali ve Ali Bey b. Mehmed ta‘rîfleri ile mu‘arrefe oldukdan sonra mezbûre Afife Hatun meclis-i ma‘kūd-ı mezbûrda işbu râfi‘atü’l-kitâb vâlidesi mezbûre Merve Hatun mahzarında ikrâr ve takrîr-i kelâm edip mahmiye-i mezbûrede Hacı Küçük mahallesinde vâki‘ bir tarafı es-Seyyid İbrahim Bey mülkü ve bir tarafı Râbia Hatun bt. Mehmed mülkü ve ba‘zan Kalender b. Abdullah mülkü ve bir tarafı tarîk-i âm ile mahdûd menzili bundan akdem cemî‘ tevâbi‘ ve levâhıkı ve kâffe-i hukūk ve merâfıkı ile vâlidem mezbûre Merve bana hîbe-i sahîha-i şer‘iye ile hîbe ve temlîk ve teslîm edip ben dahi ittihâb ve kabûl ve tesellüm ve kabz eylemişdim menzil-i mahdûd-ı mezkûr bir yetmiş Zilka‘desi’nin on altıncı gününde vâki‘ olan harîk-i gālibde bi’l-külliye muhterik olup iki mahzen ve bir sagīr hamam ve arsa-i hâliye kalmış idi hâlâ hudûd-ı mezbûre ile mahdûd olan arsa-i hâliye ve iki mahzen ve bir sagīr hamamı vâlidem mezbûre Merve Hatun’a ben dahi hîbe-i sahîha-i şer‘iye ile hîbe ve temlîk ve teslîm edip ol dahi ittihâb ve kabûl eyledi ba‘de’l-yevm hudûd-ı mezkûr ile mahdûd olan menzil arsasını ve iki mahzen ve bir sagīr hamam vâlidem mezbûre Merve’nin mal-ı mevhûbudur vechen mine’l-vücûh benim alâka ve medhalim kalmamışdır keyfe mâ teşâ’ ve tahtâr mutasarrıfe olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa b. İsa ve Mehmed b. Ramazan ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’s-sâlikîn eş-Şeyh Mehmed Efendi b. eş-Şeyh Abdülkerim, Fahrü’l-müderrisîn Yusuf Efendi b. eş-Şeyh Ahmed, Mehmed Efendi b. Kemâl el-müezzin, Hasan Efendi b. Receb, el-Hâc Ali b. Mustafa, Yusuf Efendi b. Musa, Mehmed Efendi b. eş-Şeyh Hüseyin, Ali Dede b. Mustafa, Ramazan Halîfe b. Hüseyin el-müezzin, Osman Bey b. Ahmed, Bayram b. Ali, el-Hâc Mustafa b. Eyüb, Bayram Efendi b. Ali el-müderris, Mehmed Bey b. Receb el-mehter.