İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 735 Hüküm no: 886 Orijinal metin no: [113a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe b. Behram’ın Kayazâde Mehmed Çavuş Vakfı’ndan borç aldığı İstiğlâl. Mahmiye-i İstanbul’da Magnisalı Çelebi mahallesinde sâkin İbrahim Beşe b. Behram nâm kimesne mahfil-i kazâda mahmiye-i mezbûrede merhûm Kayazâde Mehmed Çavuş Vakfı’na hâlâ mütevellî olan işbu bâ‘isü’l-kitâb Mustafa Efendi b. İbrahim Efendi mahzarında ikrâr ve takrîr-i kelâm edip mahalle-i mezbûrede vâki‘ bir tarafı Kemâl Beşe b. ( ) veresesi mülkü ve bir tarafı Mehmed Çelebi mülkü ve bir tarafı el-Hâc Receb Beşe mülkü ve bir tarafı tarîk-i âm ile mahdûd mülk menzilimi bi-cümleti’t-tevâbi‘ ve’l-levâhık mezbûr Mustafa Efendi’ye yüz kıt‘a riyâlî guruşa bey‘ ve teslîm ol dahi mal-ı vakf-ı mezbûr ile bi-tarîkı’l-istiğlâl iştirâ ve kabûl ve kabz ve tesellüm eyledikden sonra yine menzil-i mahdûd-ı mezbûru kabûl, merkūm Mustafa Efendi bana ba‘de’t-tahliyeti’ş-şer‘î ve’t-tekābuzi’l-mer‘î bin yetmiş üç senesi Muharremi gurresinden sene-i mezbûre Zilhiccesi gāyetine dek on beş kıt‘a riyâlî guruşa îcâr ve teslîm ben dahi ber-vech-i muharrer istîcâr ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-[yevmi’l]-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Himmet Halîfe b. İbrahim, Ömer Halîfe b. Hızır, Hüseyin Halîfe b. ( ), Ahmed b. Mehmed, Hasan b. Yusuf, el-Hâc Muharrem b. ( ), Mustafa b. Yakub.