İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 735 Hüküm no: 887 Orijinal metin no: [113a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleksan v. Serkiz’in Eğin’e bağlı Gemirgap köyündeki bağını Yagob v. Navzer’e sattığı Mübâya‘a-i yağ. Vilâyet-i Anadolu’da Eğin kazâsına tâbi‘ Gemirgap nâm karye sükkânından Aleksan v. Serkiz nâm zimmî meclis-i şer‘de işbu hâmilü’s-sifr Yagob v. Navzer nâm zimmî muvâcehesinde ikrâr ve takrîr-i kelâm edip akd-i âtî sudûruna dek silk-i mülkümde olup karye-i mezbûre sınırı ve kürûmu dâhilinde vâki‘ bir tarafdan Abbas Çelebi bağına ve bir tarafdan Davud Çelebi bağına ve bir tarafdan müşteri-i mezbûr bağına ve bir tarafdan Serkiz nâm zimmî bağına müntehî ve mahdûd bir kıt‘a mülk bağımı bi-cümleti’t-tevâbi‘ ve’l-levâhık mezbûr Yagob’a yedişer dirhem gelir kırk yedi riyâlî guruşa bâtten bey‘ edip ol dahi minvâl-i muharrer üzere iştirâ ve kabûl edip semen-i mezkûru yedinden tamamen alıp kabz eylediğimden sonra mebî‘-i mezkûru mahâllinde kabz ve tasarrufa müşteri-i mezbûr Yagob’u taslît eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdi b. Hüseyin, Veli b. Mahmud, Mustafa b. İsa, Mustafa b. Mehmed el-kassab, Hasan b. Mustafa.