İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 738 Hüküm no: 892 Orijinal metin no: [113b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Himmet’in öldükten sonra malının üçte birine Mehmed Çelebi’yi vasî tayin ettiği Nasb-ı vasî. Elhamdü li-veliyyihî ve’s-salâtü alâ-nebiyyihî Muhammed ve âlihî ve sahbihî ecma‘în ve ba‘d işbu kitâbın tahrîrine bâ‘is oldur ki mahmiye-i İstanbul’da Kalenderhâne mahallesinde sâkine Fâtıma bt. Himmet nâm hatun meclis-i şer‘de sâbıkā odabaşı olan Mehmed Çelebi mahzarında tav‘an ikrâr ve takrîr-i kelâm edip bi-emrillâhi te‘âlâ fevt olduğumdan sonra sülüs-i mâlımdan on beş bin akçe ile on beş riyâlî guruşu ahz u kabz eyledikden sonra vasîyy-i muhtârım olup on bin akçesini techîz ve tekfînime ve eyyâm-ı mu‘tâdede tabh-ı ta‘âma ve meblağ-ı mezbûr on beş riyâlî guruşu Mustafa b. ( ) vere ve meblağ-ı mezbûr beş bin akçemi mahalle-i merkūme avârızına vakf edip avârız mütevellîsine teslîm eyleye deyü Mehmed Çelebi’yi vasîyy-i muhtâr nasb ü ta‘yîn eyledikde ol dahi vesâyet-i merkūmeyi kabûl ve hidemât-ı merkūmesini vaktinde edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mahmud Efendi imâm-ı câmi‘-i Kalenderhâne, Müezzin İlyas Çelebi, Osman Çelebi el-müezzin, Nasuh Efendi, Çorbacızâde Mustafa Çelebi, Receb Efendi el-müderris, el-Hâc Ahmed Efendi, Mahmud Çelebi er-râcil, Hüseyin Efendi el-Burûsî.