İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 738 Hüküm no: 893 Orijinal metin no: [113b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun bt. Ahmed’in mülk menzilini aldığı borç karşılığında Müderris Mehmed Efendi’ye rehin verdikten sonra bir yıllığına kiraladığı İstiğlâl. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi mahmiye-i İstanbul’da Mi‘mâr Sinan mahallesinde efdalü’l-müderrisîni’l-kirâm Seyyid Mehmed Efendi b. el-merhûm Mehmed Efendi’nin sâkin olduğu menzile varıp zeyl-i rakîmde isimleri mastûr olan Müslimîn huzûrunda akd-i meclis-i şer‘ eylediğinde mahmiye-i mezbûrede Ali Paşa-yı Atîk mahallesinde sâkine zâtı mefharu’l-mahâdimi’l-l-kirâm Salih Mehmed Efendi b. eş-Şeyhzâde Mehmed Efendi ve Mustafa Efendi b. Mehmed ta‘rîfleri ile mu‘arrefe olan Sâliha Hatun bt. Ahmed meclis-i ma‘kūd-ı mezbûrda işbu kitâbın sahibi müşârün-ileyh Seyyid Mehmed Efendi mahzarında ikrâr ve i‘tirâf edip zikrolunan Ali Paşa-yı Atîk mahallesinde vâki‘ bir tarafı Kazgancı Vakfı’na ve bir tarafı E(?)tyemez zâviyesine ve bir tarafı tarîk-i âmma müntehî mülk menzilimi mûmâ-ileyhe bi-tarîkı’l-istiğlâl her biri yedişer [dirhem] yüz elli riyâlî guruşa bey‘ ve teslîm ol dahi vech-i muharrer üzere iştirâ ve kabûl ve tesellüm eyledikden sonra semeni olan meblağ-ı mezbûru bi’t-tamam yedinden ahz u kabz edip menzil-i mahdûd-ı mezkûru ba‘de’t-tahliyeti’ş-şer‘iye târih-i kitâbdan bir sene tamamına değin mûmâ-ileyhden [her biri] yedişer dirhem altmış guruşa istîcâr ve kabûl edip ol dahi îcâr ve teslîm eyledi dedikde gıbbe’t-tasdîk menzil-i mezbûrun derkine ve ücret-i lâzımesine merkūme Sâliha Hatun’un sadrî oğulları umdetü’l-mevâliyi’l-izâm Mehmed Efendi b. Mehmed Efendi emr ve kabûlü hâviye kefâletle kefîl olmağın vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa b. Ahmed ile meclis-i şer‘a gelip alâ-vukū‘ihî inhâ ve ihbâr etmeğin mâ-vaka‘a bi’t-taleb ketb olundu. Fi’l-yevmi’s-sâmin aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ahmed Efendi b. Abdülmecid, Abdülkadir Efendi b. ( ), Salih Efendi b. ( ) el-imâm, Mustafa Efendi b. Mehmed, Salih Çelebi b. ( ), Yusuf Efendi b. ( ).