İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 749 Hüküm no: 908 Orijinal metin no: [117a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Abdi b. Mehmed’in varislerinden oğlu Receb ile karısı Saime bt. Abdullah’ın miras hususunda birbirlerinin zimmetlerini ibra ettikleri İbrâ. Mahmiye-i İstanbul’da Cebecibaşı mahallesi sâkinlerinden olup bundan akdem vefât eden Abdi b. Mehmed nâm kimesnenin verâseti zevce-i metrûkesi Saime bt. Abdullah ile sulbî kebîr oğlu Receb nâm kimesneye münhasıra olduğu şer‘an zâhir ve mütehakkık oldukdan sonra mezbûr Receb meclis-i şer‘-i hatîr-i lâzımü’t-tevkīrde müteveffâ-yı mezbûrun muhallefâtına vâzı‘atü’l-yed olan işbu râfi‘atü’l-kitâb mezbûre Saime mahzarında ikrâr ve takrîr-i kelâm edip babam müteveffâ-yı mezbûr Abdi’nin muhallefâtından ırsen bana intikāl sekiz sehimden yedi sehm hisseme isâbet eden ma‘lûmü’l-mikdâr meblağı mezbûre Saime yedinden bi’t-tamam ve’l-kemâl ahz u kabz edip husûs-ı mirasa müte‘allika cemî‘ de‘âvî ve mütâlebâtdan mezbûre Saime’yi ibrâ-i âmm-ı kātı‘u’n-nizâ‘la ibrâ ve ıskāt eyledim dedikde mukırr-ı merkūm Receb’in minvâl-i muharrer üzere cârî olan ikrârını mukarrun-lehâ olan merkūme Saime bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Derviş Mehmed b. Hüseyin, Mahmud b. Abdullah, Hasan b. Mustafa, Veli b. Mahmud ve gayruhum.