İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 750 Hüküm no: 909 Orijinal metin no: [117a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Hüsrev’in satın aldıktan sonra ayıplı olduğu anlaşılan cariyeyi satıcıya reddi ve parasının kendisine iadesi Mahmiye-i İstanbul’da Gürcibaşı mahallesinde sâkine bâ‘isetü’l-vesîka Hadîce bt. Hüsrev nâm hatun mahfil-i kazâda Mustafa Beşe b. Hasan mahzarında üzerine da‘vâ ve takrîr-i kelâm edip mezbûr Mustafa Beşe târih-i kitâbdan kırk beş gün mukaddem işbu orta boylu açık kaşlı gök elâ gözlü Rusiyyetü’l-asl Gülbûy bt. Abdullah nâm câriye-i memlûkesini cemî‘ uyûbdan sâlime olmak üzere dokuz bin akçeye bana bey‘ ve teslîm ve ben dahi iştirâ ve kabûl eyledikden sonra semen-i mezbûrun sekiz bin dört yüz akçe hesâbınca her biri üçer yüz akçeye olmak üzere yirmi beş yaldız altını ve her biri yüzer akçeye olmak üzere dokuz guruş def‘ ü teslîm ve ol dahi ahz u kabz etmişdir câriye-i mezbûre akdü’t-tüccâr noksan semen îcâb eder istiskā marazı ile mu‘ayyebe olup ayb-ı kadîmine muttali‘ olmağla reddolunup semen-i mezbûrdan teslîm eylediğim meblağ-ı mezbûru istirdâd ederim dedikde teveccüh-i husûmet için bu makūle emrâz taraf-ı Saltanat-ı Aliyye’den teşhîs için ta‘yîn olunan hâssa etibbâdan Mustafa Efendi b. Ahmed ve Ahmed Efendi b. Mehmed ve huddâm-ı mahkemeden Ahmed b. Abdülcabbar ve Mustafa b. Ahmed ile irsâl ve irâet olundukda mezbûrân Mustafa Efendi ve Ahmed Efendi ba‘de’n-nazar câriye-i mezbûrenin sû’i’l-kınye ta‘bîr olunur marazı ile mu‘ayyebe olduğunu ihbâr eylediklerinde gıbbe’l-istintâk mezbûr Mustafa Beşe semen-i mezbûre cemî‘ uyûbdan sâlime olmak üzere bey‘ ve semenden sekiz bin dört yüz akçe hesâbınca yirmi beş yaldız altını ve dokuz guruşun kabzını ikrâr, ayb-ı mezbûrun kıdemini [inkâr] edicek mezbûre Hadice’den müdde‘âsını mübeyyine beyyine taleb olundukda mezbûrân Mustafa Efendi ve Ahmed Efendi li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu câriye-i mezbûrede olan sû’i’l-kınye ta‘bîr olunur marazı kırk elli günde hâdis olur maraz olmayıp kadîmdendir deyü her biri edâ-i şehâdet-i şer‘iye etdiklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra müdde‘î-i mezbûre câriye-i mezbûreyi istihdâm ve kendinden kabûlünü müş‘ir bir fi‘il sâdır olmadığına merkūm Mustafa Beşe yemîn vermemeğin mûcebince câriye-i mezbûreyi ahz ve makbûzu olan meblağ-ı merkūmu mezbûra teslîme mezbûr Mustafa Beşe’ye ba‘de’t-tenbîh mâ-vaka‘a bi’t-taleb ketb olundu. Hurrire fi’l-yevmi’s-sâmin ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Beşe b. ( ) el-mübâşir, Abdi b. Hüseyin, Mehmed b. Ramazan, Hasan b. Bayram, Rasûl b. Rıdvan.