İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 751 Hüküm no: 911 Orijinal metin no: [117a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fakir olan Emine bt. Abdullah’a oğlu Mehmed Beşe’nin günlük beş akçe nafaka vermesine hükmolunduğu Nafaka. Mahmiye-i İstanbul’da Hoca Hayreddin mahallesi sâkinelerinden işbu râfi‘atü’l-kitâb Emine Hatun bt. Abdullah meclis-i şer‘-i hatîr-i lâzımü’t-tevkīrde sadrî kebîr oğlu Mehmed Beşe b. Mustafa mahzarında takrîr-i kelâm edip [117b] ben fakīre ve mu‘assere olup nafaka ve kisveye eşedd-i ihtiyâc ile muhtâc olmağla oğlum mezbûr Mehmed Beşe üzerine kadr-ı ma‘rûf bana nafaka ve kisve-[bahâ] takdîr olunması matlûbumdur dedikde hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri mezbûre Emine için oğlu mezbûr Mehmed Beşe üzerine külle yevm beş akçe nafaka takdîr edip vakt-i zarûretde istidâne ve lede’z-zafer oğlu mezbûr Mehmed Beşe’ye rücû‘a izin verilmeğin mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdi Çelebi b. Hüseyin, Şükrullah b. Mustafa, Mustafa Çelebi b. Ahmed, Baba Rasûl b. Rıdvan.