İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 752 Hüküm no: 912 Orijinal metin no: [117b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Mehmed’in mehir ve nafaka hususunda boşandığı kocası Mehmed Bey b. İbrahim ile sulh olup zimmetini ibra ettiği İbrâ. Vilâyet-i Anadolu’da Rize kasabasında Fatoğlu mahallesi sâkinlerinden olup mahmiye-i İstanbul’da müsâfereten ( ) mahallede sâkine olan Sâliha Hatun bt. Mehmed meclis-i şer‘-i hatîrde zevc-i mutallıkı işbu râfi‘u’l-kitâb Mehmed Bey b. İbrahim mahzarında tâyi‘aten ikrâr ve takrîr-i kelâm edip mezbûr Mehmed Bey zevcim olup beni talâk-ı bâyin ile tatlîk etmeğin zimmetinde mütekarrir ve ma‘kūdün-aleyh olan dört bin akçe mehr-i mü’eccelimi ve sagīre kızı Havva’nın yedimde olan hüccet-i şer‘iye nâtıka olduğu üzere yevmî beşer akçeden on iki senede nafaka-i müstedânesinden müctemi‘ olan yirmi bir bin altı yüz akçe ki cem‘an yirmi beş bin altı yüz [akçe] hakkımı bundan akdem mezbûrdan taleb eylediğimde iki bin akçesini hazır bi’l-meclis Hasan Beşe yediyle bana teslîm edip bâkīsi olan yirmi üç bin altı yüz akçesini dahi taleb eylediğimde ol dahi mehr-i mü’eccelin ancak beş yüz akçedir deyü ziyâdesi ile nafaka-i mezkûreyi inkâr ve ben dahi müdde‘âmı şuhûd-ı udûl şehâdetleri ile isbât sadedinde olmağla beynimizde münâza‘ât-ı kesîre ve muhâsamât-ı şedîde ve ekîde vâkı‘a olmuş idi el-hâletü hâzihî mâ-beynimize Müslimûn ve muslihûn vesâtet ile mezbûr Mehmed Bey benimle meblağ-ı mezbûr da‘vâsından iki bin beş yüz akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûru tamamen yedinden alıp kabz edip mâ‘adâsından zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Beşe b. Haydar el-hayyât, Hasan Beşe b. Ahmed, Ali Çavuş b. Şaban, Fazlı Bey b. Hüseyin, Mehmed b. Mehmed.