İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 752 Hüküm no: 913 Orijinal metin no: [117b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Rahime Hatun’un Rus asıllı cariyesi Munise’yi azat ettiği Keşif [Itk-nâme]. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi Dârü’l-hilâfeti’l-aliyye Kostantıniyyeti’l-mahmiye’de Kirmasti mahallesinde efdalü’l-müderrisîni’l-kirâm es-Seyyid Mehmed Ebussuûd Efendi b. Mevla’l-merhûm Mehmed Esad Efendi’nin sâkin olduğu menzile varıp zeyl-i rakīmde isimleri mastûr olan Müslimîn huzûrunda akd-i meclis-i şer‘ eyledikde menzil-i mezbûrda sâkine mefharu’l-muhaddarât Şerife Rahime Hatun tarafından zikri âtî i‘tâkı ikrâra vekîl olup mezbûrenin zâtını ma‘rifet-i şer‘iye ile ârifân olan birâderleri mûmâ-ileyh Mehmed Ebussuûd Efendi ile Şaban Çelebi b. Abdi şehâdetleriyle şer‘an vekâleti sâbite olan Mehmed Efendi b. Şaban meclis-i ma‘kūd-ı mezbûrda bi’l-vekâle ikrâr ve i‘tirâf edip müvekkilem mezbûre kendine rıkkını mu‘terife olan açık kaşlı kara gözlü uzun boylu Rusiyyetü’l-asl bâ‘isetü’r-rakīm Munise bt. Abdullah nâm câriye-i memlûke[mi] hasbeten lillâhi te‘âlâ tahrîr ve i‘tâk ve silk-i harâ’ir-i asliyâta idrâc ve ilhâk eyledim ba‘de’l-yevm mezbûre Munise sâyir harâ’ir-i asliyât gibi hürre olup üzerinde velâdan gayrı hakkım bâkī kalmadı dedi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hasan b. Bayram ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdülkerim b. ( ), Osman b. ( ), Süleyman Efendi b. ( ), Mustafa b. İsa, es-Seyyid Abdülbaki Çelebi.