Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 90 Hüküm no: 75 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş v. Dimitri’nin bahçesini İbrahim Çelebi’ye sattığı Galata kazâsı muzâfâtından Kapudağ nâhiyesine tâbi‘ Dragon nâm karye ahâlîsinden Anaştaş v. Dimitri mahfil-i kazâda İbrahim Çelebi b. İlyas mahzarında ikrâr edip silk-i mülkümde münselik olup karye-i mezbûre sınırında vâki‘ ma‘lûmü’l-hudûd olan iki kıt‘a bağçelerimi mezbûr İbrahim Çelebi’ye dört bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzere iştirâ ve kabûl eyledikden sonra semenleri olan meblağ-ı mezbûru mezbûr İbrahim Çelebi yedinden bi’t-tamam alıp kabz eyledikden sonra zikr olunan bağçeleri mahallinde zabt u tasarrufa mezbûr İbrahim Çelebi’ye teslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sânî aşer min-şehri Ramazani’l-mübârek li-sene selâse ve sittin ve elf. Şuhûdü’l-hâl: Mehmed Beşe b. Mustafa, Ahmed Beşe b. Mustafa, Hüseyin Beşe b. Mustafa, el-Hâc Emrullah b. Ahmed, Mustafa b. Bedreddin, el-Hâc Mehmed b. Aydın, Ahmed Çelebi b. Ali, Mehmed Çelebi b. Süleyman Çukadâr, Rıdvan b. Abdullah.