Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 91 Hüküm no: 76 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa’nın, Ramazan b. Abdullah’a olan borcunu ödemesi gerektiği İşbu bâ‘isü’l-kitâb Ramazan b. Abdullah nâm kimesne makām-ı kazâda Mehmed b. Mustafa nâm kimesne muvâcehesinde üzerine da‘vâ edip bundan akdem mezbûr Mehmed Malta’da esîr olmağın gāib ani’l-meclis Saro nâm zimmî mezbûr Mehmed’i Malta’dan üç yüz guruşa çıkarıp mezbûr Mehmed zimmetinde olan üç yüz guruşa emr ve kabûlü hâviye kefâlet ile ben kefîl bi’l-mâl olmuşumdur. Hâlâ kefâletim hasebiyle meblağ-ı mezbûru mezbûr Saro’ya edâ eylemişdir, suâl olunup alıverilmesi matlûbumdur dedikde gıbbe’s-suâl mezbûr Mehmed cevâbında fi’l-hakīka minvâl-i muharrer üzere gāib-i mezbûr Saro’yu Malta’dan ihrâc eyledikde bana verdiği karz üç yüz guruşa mezbûr Ramazan Bey kefîl olmuş idi. Hâlâ kefâleten edâ edip benim dahi zimmetimde üç yüz guruş mezbûr Ramazan’a deynim vardır dedikde ikrârı mûcebince meblağ-ı mezbûru müdde‘î-i mezbûra edâ ve teslîm etmek üzere tenbîh olunup mâ-vaka‘a bi’t-taleb ketb olundu. Tahrîren fi’l-yevmi’l-hâdî aşer min-Ramazani’l-mübârek li-sene selâse ve sittin ve elf. Şuhûdü’l-hâl: Sinan Beşe b. İbrahim, Ahmed Beşe b. Sinan, Mustafa Beşe b. Mehmed, Mehmed Beşe b. Hoca? Süleyman b. Abdullah, Memi b. Mehmed, Derviş b. Ali, Ahmed b. Ali, Rıdvan b. Abdullah, Resül b. Hüseyin.